യുഡിഎഫ് പിന്തുണച്ചാല് അടുത്ത തിരഞ്ഞെടുപ്പില് പിണറായിക്കെതിരെ മത്സരിക്കുമെന്ന് പിവി അന്വര്. താന് കണകാക്കുന്നത് അടുത്ത തിരഞ്ഞെടുപ്പിലും പിണറായി മത്സരിക്കും എന്നുതന്നെയാണ്. അദ്ദേഹത്തിന്റെ ആഗ്രഹവും താല്പ്പര്യവും അടുത്ത മുഖ്യമന്ത്രി പദം ആണ്. അങ്ങനെ ഒരു സാഹചര്യം വന്നാല് അവിടെ താന് മത്സരിക്കുമെന്നാണ് അന്വര് പറഞ്ഞത്.
ഉറച്ചകോട്ടകളൊക്കെ പണ്ടത്തെ കാലത്തായിരുന്നു. ഇളക്കം തട്ടില്ല, തൊടാന് പറ്റില്ല എന്ന് പറയുന്ന കാലമൊക്കെ കഴിഞ്ഞു. ജനങ്ങള്ക്ക് എല്ലാ കാര്യങ്ങളും മനസിലായിക്കഴിഞ്ഞു. ഇപ്പോഴുള്ളതെല്ലാം ഇളകിയ കോട്ടകളാണ്. അടിത്തറ ഇളകിയ കോട്ടകള്. പിണറായിയെ താഴെയിറക്കാനുള്ള പോരാട്ടത്തിനാണ് യുഡിഎഫ് നിരുപാധിക പിന്തുണ പ്രഖ്യാപിച്ചിട്ടുള്ളതെന്നും അന്വര് വ്യക്തമാക്കി.
അത് അങ്ങനെ തന്നെ തുടരും. എനിക്ക് എത്ര സീറ്റുവേണം ആ സീറ്റു വേണം എന്നൊക്കെ പറയാന് സാധിക്കുമോ? അതൊക്കെ അവരാണ് മാന്യമായി പരിഗണിക്കേണ്ടത്. ഈ തിരഞ്ഞെടുപ്പില് മത്സരിക്കുന്നില്ല, പാര്ലമെന്ററി രാഷ്ട്രീയ രംഗത്ത് നിന്ന് പിന്മാറിയെന്നോ ജീവിതത്തില് ഇനിയൊരിക്കലും മത്സരിക്കില്ലെന്നോ ഒന്നും പറഞ്ഞിട്ടില്ലെന്നും അന്വര് കൂട്ടിച്ചേര്ത്തു.