തിരുവനന്തപുരം പാറശ്ശാലയില് കാമുകി നല്കിയ കഷായവും ജ്യൂസും കഴിച്ച യുവാവ് മരിച്ച സംഭവത്തില് പ്രതികരണവുമായി ഒപ്പമുണ്ടായിരുന്ന സുഹൃത്ത് റെജിന്. എന്തിനാണ് കഷായം കുടിച്ചെന്നു ചോദിച്ചപ്പോള് പിന്നീട് പറയാമെന്നും പറഞ്ഞെന്നും യാത്രയ്ക്കിടെ പലതവണ നീലനിറത്തില് ഷാരോണ് ഛര്ദിച്ചിരുന്നെന്നും റെജിന് വെളിപ്പെടുത്തി.
സംഭവ ദിവസം റെജിനെ വെളിയില് കാത്ത് നിര്ത്തി ഷാരോണ് നടന്ന് പെണ്കുട്ടിയുടെ വീട്ടിലേക്കു പോയി. 15 മിനിറ്റിനുശേഷം റെജിനെ ഷാരോണ് ഫോണില് വിളിച്ചു. ഫോണില് സംസാരിക്കുമ്പോള് ഷാരോണ് ഛര്ദിക്കുന്നുണ്ടായിരുന്നെന്ന് റെജിന് പറയുന്നു. ബൈക്കുമായി പെണ്കുട്ടിയുടെ വീടിനു മുന്നിലെത്തിയപ്പോള് ഷാരോണ് ഛര്ദിച്ച് അവശനായിരുന്നു.
എന്താണ് ഛര്ദിക്കുന്നതെന്ന് റെജിന് ചോദിച്ചപ്പോള് കഷായം കഴിച്ചെന്നായിരുന്നു മറുപടി. എന്തിനു കഷായം കുടിച്ചെന്നു ചോദിച്ചപ്പോള് പിന്നീട് പറയാമെന്നും പറഞ്ഞു. യാത്രയ്ക്കിടെ പലതവണ നീലനിറത്തില് ഛര്ദിച്ചു. പിന്നീട് വൈകിട്ട് ഫോണില് സന്ദേശം അയച്ച് ഛര്ദില് കുറഞ്ഞോ എന്നു ചോദിച്ചപ്പോള് കുറവുണ്ടെന്നായിരുന്നു എന്നാണ് മറുപടി നല്കിയതെന്ന് റെജിന് പറഞ്ഞു.
ഈ പെണ്കുട്ടിയുമായുള്ള പ്രണയത്തെക്കുറിച്ച് പറഞ്ഞിട്ടുണ്ടെങ്കിലും കൂടുതല് കാര്യങ്ങള് ഷാരോണ് പങ്കുവച്ചിരുന്നില്ലെന്നും റെജിന് പറഞ്ഞു. പെണ്സുഹൃത്തിന്റെ വീട്ടില്നിന്ന് കഷായവും ജൂസും കുടിച്ച് അവശനായ ഷാരോണ് ചികിത്സയ്ക്കിടെ ഈ മാസം 25നാണ് മരിച്ചത്. പെണ്കുട്ടിയുടെ കുടുംബം ആസിഡ് കലര്ന്ന പാനീയം നല്കിയെന്നാണ് യുവാവിന്റെ ബന്ധുക്കളുടെ ആരോപണം. ഇക്കാര്യം പെണ്കുട്ടി നിഷേധിച്ചിട്ടുണ്ട്.