മുണ്ടക്കൈ, ചൂരൽമല ഉരുൾപൊട്ടലിൽ കാണാതായവരെ മരിച്ചതായി പ്രഖ്യാപിക്കാൻ സംസ്ഥാന സർക്കാർ തീരുമാനിച്ചു. ഈ നടപടി അവരുടെ അടുത്ത ബന്ധുക്കൾക്ക് എക്‌സ്‌ഗ്രേഷ്യ (മരണപ്പെട്ടവരുടെ കുടുംബത്തിന് സർക്കാരിന്റെ ഭാഗത്ത് നിന്ന് ലഭിക്കുന്ന ധന സഹായം) ലഭിക്കാൻ സഹായിക്കും. കാണാതായവരെ മരിച്ചതായി പ്രഖ്യാപിക്കുന്നതിന് ആവശ്യമായ നടപടിക്രമങ്ങൾ സ്വീകരിക്കാൻ കമ്മിറ്റികൾ രൂപീകരിക്കാൻ സർക്കാർ ചൊവ്വാഴ്ച നിർദ്ദേശം നൽകി. 2024 ജൂലൈ 30-ന് വയനാടിന്റെ മലയോര മേഖലയായ മുണ്ടക്കൈ, ചൂരൽമല പ്രദേശങ്ങളിൽ നാശം വിതച്ച ദുരന്തത്തിൽ കാണാതായ 35 പേരുടെ കുടുംബങ്ങൾക്ക് വലിയ ആശ്വാസമാണ് ഈ തീരുമാനം.
ബന്ധുക്കൾക്ക് കാണാതായവർ മരിച്ചതായി കണക്കാക്കി അവർക്ക് എക്‌സ്‌ഗ്രേഷ്യ നൽകുന്നതിനുള്ള ശുപാർശകൾ സമിതികൾക്ക് നൽകും. പ്രാദേശിക തലത്തിലും സംസ്ഥാന തലത്തിലും ഇത്തരം സമിതികൾ രൂപീകരിക്കും. സർക്കാർ ഉത്തരവ് പ്രകാരം കാണാതായവരുമായി ബന്ധപ്പെട്ട് രജിസ്റ്റർ ചെയ്ത എഫ്ഐആർ റവന്യൂ വകുപ്പ് ഉദ്യോഗസ്ഥർ ശേഖരിക്കും. തുടർന്ന് കാണാതായവരെ കണ്ടെത്താനായില്ലെന്ന് ചൂണ്ടിക്കാട്ടി പ്രത്യേക അന്വേഷണ റിപ്പോർട്ട് ഉദ്യോഗസ്ഥർ തയ്യാറാക്കും.
പഞ്ചായത്ത് സെക്രട്ടറി, വില്ലേജ് ഓഫീസർ, പോലീസ് സ്റ്റേഷൻ ഹൗസ് ഓഫീസർ എന്നിവർ ലോക്കൽ ലെവൽ കമ്മിറ്റിയിൽ അംഗങ്ങളായിരിക്കും. സമിതി കാണാതായവരുടെ പട്ടിക തയ്യാറാക്കി ജില്ലാ ദുരന്തനിവാരണ അതോറിറ്റി (ഡിഡിഎംഎ) മുമ്പാകെ സമർപ്പിക്കും. ഡിഡിഎംഎ ലിസ്റ്റ് പരിശോധിച്ച് ഉചിതമായ നിർദേശങ്ങളോടെ സംസ്ഥാനതല സമിതിക്ക് കൈമാറും. പ്രാദേശികതല സമിതി നൽകുന്ന പട്ടിക സംസ്ഥാനതല സമിതി
കൃത്യമായ പരിശോധനയ്ക്ക് ശേഷം സംസ്ഥാന സർക്കാരിന് സമർപ്പിക്കും. തുടർന്ന് മരിച്ചവരുടെ ബന്ധുക്കൾക്ക് മരിച്ചതായി കണക്കാക്കി അവർക്ക് എക്‌സ്‌ഗ്രേഷ്യ നൽകി സർക്കാർ ഉത്തരവിറക്കും.
ഉരുൾപൊട്ടലിൽ കാണാതായവരെ മരിച്ചതായി കണക്കാക്കാൻ ഉദ്യോഗസ്ഥർ സ്വീകരിക്കേണ്ട നടപടികളും സർക്കാർ അറിയിച്ചിട്ടുണ്ട്. കാണാതായ ആളുടെ ഏറ്റവും അടുത്ത ബന്ധു അദ്ദേഹം താമസിച്ചിരുന്ന പോലീസ് സ്റ്റേഷനിൽ എഫ്ഐആർ ഫയൽ ചെയ്യണം. മറ്റൊരു പോലീസ് സ്റ്റേഷൻ പരിധിയിലാണ് കാണാതായതെങ്കിൽ എഫ്ഐആർ ആ സ്റ്റേഷനിലേക്കും റഫർ ചെയ്യണം. നോട്ടറി പബ്ലിക് സാക്ഷ്യപ്പെടുത്തിയ, കാണാതായ ആളുടെ അടുത്ത ബന്ധു നൽകിയ മൊഴി സ്ഥിരം രേഖയായി സൂക്ഷിക്കണം. പോലീസ് റിപ്പോർട്ട്, റേഷൻ കാർഡ്, ബാങ്ക് പാസ്ബുക്ക്, തിരിച്ചറിയലിന് ആവശ്യമായ മറ്റ് രേഖകൾ എന്നിവ സഹിതം എഫ്ഐആർ തഹസിൽദാർ/ സബ് ഡിവിഷണൽ മജിസ്‌ട്രേറ്റിന് കൈമാറണം.
എതിർപ്പുകൾ ഉയർന്നാൽ തഹസിൽദാർ/സബ് ഡിവിഷണൽ മജിസ്‌ട്രേറ്റ് റാങ്കിന് മുകളിലുള്ള ഉദ്യോഗസ്ഥർ അന്വേഷണം നടത്തി തഹസിൽദാർ/സബ് ഡിവിഷണൽ മജിസ്‌ട്രേറ്റിന് വിശദമായ റിപ്പോർട്ട് നൽകണം. റിപ്പോർട്ടിൻ്റെ അടിസ്ഥാനത്തിൽ മരണസർട്ടിഫിക്കറ്റ് നൽകണോ വേണ്ടയോ എന്ന് ഉദ്യോഗസ്ഥന് തീരുമാനമെടുക്കാം.