വില്ലേജ് ഓഫീസില്‍ ചെന്ന് പത്ത് രൂപ നികുതി അടയ്ക്കാന്‍ കഴിയുമായിരുന്ന സ്ഥാനത്ത്, 20 രൂപ അക്ഷയ കേന്ദ്രത്തില്‍ ഫീസ് നല്‍കേണ്ടി വരുന്നത് പരിശോധിക്കണമെന്ന് വി.എസ് അച്യുതാനന്ദന്‍
സുപ്രീം കോടതിയുടെ നിര്‍ദ്ദേശങ്ങള്‍ക്ക് വിരുദ്ധമായി, എല്ലാ സേവനങ്ങള്‍ക്കും ആധാര്‍ നല്‍കാന്‍ നിര്‍ബന്ധിക്കുന്നത് ഇ-ഗവേണ്‍സിന്റെ ചെലവില്‍ മറ്റ് ചില അജണ്ടകള്‍ കൂടി നടപ്പാക്കുന്നതിന് തുല്യമാണെന്നും വി.എസ് പറഞ്ഞു. മികച്ച ഭരണത്തിന് ഇ-ഗവേണ്‍സ് വിഷയത്തില്‍ ഭരണപരിഷ്‌കാര കമ്മീഷന്റെ ആഭിമുഖ്യത്തില്‍ മസ്‌കറ്റ് ഹോട്ടലില്‍ സംഘടിപ്പിച്ച ദ്വിദിന ദേശീയ സെമിനാറില്‍ സംസാരിക്കുകയായിരുന്നു, അദ്ദേഹം.
പുതിയകാലത്ത് സേവനം നല്‍കാന്‍ ഓലയും എഴുത്താണിയും പോര. ആധുനിക സാങ്കേതികത വിദ്യയുടെ സാദ്ധ്യതകള്‍ പൂര്‍ണമായും പ്രായോഗികമായും പ്രയോജനപ്പെടുത്തിയേ തീരൂ. പ്രായോഗികതയില്‍ ഊന്നിയുള്ള സമീപനങ്ങളാണ് വേണ്ടത്.
സാങ്കേതികവിദ്യയുടെ ഗുണഫലങ്ങള്‍ ജനങ്ങളിലേക്ക് എത്തിക്കണമെന്ന ധാരണക്കപ്പുറം, ഈ വിഷയത്തില്‍ താന്‍ വിദഗ്ധനല്ലെന്നും വി.എസ് കൂട്ടിച്ചേര്‍ത്തു.