രാഷ്ട്രീയ ബോധമുള്ള ഒരു യുവതയുടെ പ്രതിനിധി എന്ന നിലയില് ഏറെ പ്രതീക്ഷയുള്ള കലാകാരനാണ് വേടനെന്ന് വനം വകുപ്പ് മന്ത്രി എകെ ശശീന്ദ്രന്. വേടന്റെ അറസ്റ്റിനിടയാക്കിയതും തുടര്ന്നുണ്ടായ സംഭവങ്ങളും ദൗര്ഭാഗ്യകരമാണെന്നും ശശീന്ദ്രന് പറഞ്ഞു. വിവാദം സര്ക്കാരിനെതിരെ തിരിക്കാന് ശ്രമം നടന്നുവെന്നും മന്ത്രി കൂട്ടിച്ചേര്ത്തു.
വിഷയത്തില് പരസ്യ പ്രതികരണം നടത്തിയ ഉദ്യോഗസ്ഥരോട് വിശദീകരണം തേടും. വേടന് അറസ്റ്റിനിടയാക്കിയ സാഹചര്യങ്ങള് തിരുത്തി തിരിച്ചുവരേണ്ടതുണ്ട്. അതിനായി സാമൂഹികവും സാംസ്കാരികവുമായ പിന്തുണയുമായി വനം വകുപ്പും വേടന്റെ ഒപ്പമുണ്ടാകുമെന്നും വനം വകുപ്പ് മന്ത്രി അറിയിച്ചു.
ഇക്കാര്യത്തില് നിയമപരമായ ചില പ്രശ്നങ്ങള് കൂടിയുണ്ട്. അത് അതിന്റേതായ മാര്ഗങ്ങളില് നീങ്ങട്ടെ. വേടന്റെ ശക്തിയാര്ന്ന മടങ്ങിവരവിന് ആശംസകള് നേരുന്നു. സാധാരണ കേസുകളില് നിന്നും വ്യത്യസ്തമായി ഈ കേസുകള് സംബന്ധിച്ച് അകാരണമായ ആശങ്ക സൃഷ്ടിക്കും വിധം ചില ദൃശ്യമാധ്യമങ്ങളോട് ബന്ധപ്പെട്ട വനം വകുപ്പ് ഉദ്യോഗസ്ഥര് പ്രതികരണം നടത്തിയത് അംഗീകരിക്കാന് സാധിക്കില്ലെന്നും മന്ത്രി വ്യക്തമാക്കി.
സര്ക്കാരിന്റെ അനുമതി കൂടാതെ ഇത്തരത്തില് പരസ്യപ്രതികരണങ്ങള് നടത്തുന്നത് സര്ക്കാര് ജീവനക്കാരുടെ പെരുമാറ്റ ചട്ടങ്ങള്ക്ക് വിരുദ്ധമാണ്. ഇപ്രകാരം അപൂര്വ്വമായ ഒരു സംഭവം എന്ന നിലയില് ഈ കേസിനെ പെരുപ്പിച്ചു കാണിക്കാനിടയാക്കിയ കോടനാട് ഫോറസ്റ്റ് റേഞ്ച് ഓഫീസര് ഉള്പ്പെടെയുള്ള ഉദ്യോഗസ്ഥരോട് വിശദീകരണം തേടാന് നിര്ദേശം നല്കിയിട്ടുണ്ടെന്നും മന്ത്രി കൂട്ടിച്ചേര്ത്തു.