പന്തീരാങ്കാവ് യുഎപിഎ അറസ്റ്റില് അലന് ഷുഹൈബ്, താഹ ഫൈസല് എന്നിവരുടെ മാവോയിസ്റ്റ് ബന്ധം സ്ഥിരീകരിച്ച് സിപിഎം. വിഷയത്തില് സംസ്ഥാന സര്ക്കാരിനെതിരെ വിമര്ശനം ഉന്നയിച്ച സിപിഐ സംസ്ഥാന സെക്രട്ടറി കാനം രാജേന്ദ്രനെ കടുത്ത ഭാഷയില് സിപിഎം വിമര്ശിച്ചു.
സിപിഎം കോഴിക്കോട് ജില്ലാ കമ്മിറ്റിയംഗം പികെ പ്രേംനാഥായിരുന്നു കടുത്ത വിമര്ശനം ഉന്നയിച്ചത്. പന്നിയങ്കരയില് നടത്തിയ വിശദീകരണ യോഗത്തിലാണ് സിപിഎം കടുത്ത വിമര്ശനം ഉന്നയിച്ചത്. തെറ്റെല്ലാം പിണറായിക്കും ശരിയെല്ലാം തനിക്കും എന്നതാണ് കാനത്തിന്റെ നിലപാടെന്ന് സിപിഎം പരസ്യമായി കുറ്റപ്പെടുത്തി. രാജന് കേസില് ഈച്ചരവാര്യരോട് അനീതി കാട്ടിയ സിപിഐക്ക് പിണറായിയെ വിമര്ശിക്കാന് എന്ത് അര്ഹതയെന്നും സിപിഎം ചോദിച്ചു.
ഇരുവര്ക്കും മാവോയിസ്റ്റ് ബന്ധം ഉണ്ടെന്നതിന് വ്യക്തമായ തെളിവുണ്ടെന്ന് സിപിഎം നേതാവ് പറഞ്ഞു. തെളിവുകള് പൊലീസ് സൃഷ്ടിച്ചതല്ല, സ്ത്രീകളടക്കമുള്ള 15 ഓളം പേരുടെ സാന്നിദ്ധ്യത്തില് ആ രണ്ട് ചെറുപ്പക്കാരുടെ വീട്ടില് നിന്ന് കണ്ടെത്തിയതാണ്. താഹ മാവോയിസ്റ്റ് അനുകൂല മുദ്രാവാക്യം വിളിച്ചത് പൊലീസ് ഭീഷണി മൂലമല്ല, സ്വയം വിളിച്ചതാണ്. സിപിഎം, പാര്ട്ടി പ്രവര്ത്തകരുടെ സാന്നിദ്ധ്യത്തിലാണ് ഇരുവരുടെയും വീട്ടില് പൊലീസ് റെയ്ഡ് നടത്തിയത്. പിടിച്ചെടുത്ത രേഖകളെല്ലാം ഇവരുടെ മാവോയിസ്റ്റ് ബന്ധത്തിന് തെളിവാണെന്നും പ്രേംനാഥ് വിശദീകരിച്ചു.