ശക്തമായ മഴയെത്തുടര്ന്ന് വെള്ളക്കെട്ടുകള് രൂപപ്പെട്ട സാഹചര്യത്തില് കോട്ടയം, ചങ്ങനാശേരി, വൈക്കം താലൂക്കുകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് ( 2022 ഓഗസ്റ്റ് 30 ചൊവ്വ ) ജില്ലാ കളക്ടര് അവധി പ്രഖ്യാപിച്ചു. മുന് നിശ്ചയിച്ച സര്വകലാശാല പരീക്ഷകള്ക്ക് അവധി ബാധകമല്ല. ജില്ലയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കും ഇന്ന് അവധിയായിരിക്കും.
ഒറ്റപ്പെട്ട മഴ തുടരുന്നതിനാല് പത്തനംതിട്ട ജില്ലയിലെ എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കളക്ടര് അവധി പ്രഖ്യാപിച്ചു. എന്നാല് സര്വകലാശാല പരീക്ഷകള്ക്ക് മാറ്റമില്ല. ജില്ലയില് യെലോ അലര്ട്ട് നിലനില്ക്കുന്നതിനാലും, മലയോര മേഖലയില് ഒറ്റപ്പെട്ട കനത്ത മഴ തുടരുന്നതിനാലുമാണ് തീരുമാനമെന്ന് ജില്ലാ കലക്ടര് ദിവ്യ എസ്.അയ്യര് അറിയിച്ചു.
സംസ്ഥാനത്ത് ഇന്നും അതിശക്തമായ മഴ തുടരുമെന്ന് മുന്നറിയിപ്പ്. കാസര്കോട് ഒഴികെയുള്ള പതിമൂന്ന് ജില്ലകളില് യെല്ലോ അലര്ട്ട് പ്രഖ്യാപിച്ചു. കേരളത്തിന് സമീപത്തും ബംഗാള് ഉള്ക്കടലിലും നിലനില്ക്കുന്ന ചക്രവാതച്ചുഴിയുമാണ് മഴ ശക്തമാകാന് കാരണം.
മലയോര മേഖലകളില് ഒറ്റപ്പെട്ട കനത്ത മഴ ഉണ്ടാകും. ഉരുള്പൊട്ടല് സാധ്യത കണക്കിലെടുത്ത് മലയോര മേഖലയില് കൂടുതല് ജാഗ്രത വേണം. കേരള തീരത്ത് മത്സ്യബന്ധനത്തിന് വിലക്കേര്പ്പെടുത്തിയിട്ടുണ്ട്. രണ്ടാം തീയതി വരെ മഴ തുടരുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ വിലയിരുത്തല്.
അടുത്ത 3 മണിക്കൂറില് കേരളത്തിലെ എറണാകുളം, ആലപ്പുഴ, കോട്ടയം എന്നീ ജില്ലകളില് ഒറ്റപ്പെട്ടയിടങ്ങളില് ഇടിയോടുകൂടിയ മഴയ്ക്കും മണിക്കൂറില് 40 കീ.മി. വരെ വേഗതയില് വീശിയടിച്ചേക്കാവുന്ന കാറ്റിനും സാധ്യതയുണ്ടെന്നു കേന്ദ്ര കാലാവസ്ഥാ വകുപ്പ് അറിയിച്ചു.