ജീവന് ഭീഷണിയെന്ന് തൃക്കാക്കര നഗരസഭാ ചെയര്പേഴ്സണ് അജിത തങ്കത്തിനെതിരെ നഗരസഭാ സെക്രട്ടറി ബി അനിലിന്റെ പരാതി. നഗരസഭയിലെ ക്രമക്കേടുകള് റിപ്പോര്ട്ട് ചെയ്തതിന്റെ പേരില് അദ്ധ്യക്ഷയും ഭരണപക്ഷ കൗണ്സിലര്മാരും ചേര്ന്ന് നിരന്തരം ഭീഷണിപ്പെടുത്തുന്നുവെന്ന് പരാതിയില് ആരോപിക്കുന്നു.
അനിലിന്റെ പരാതിയില് തൃക്കാക്കര പൊലീസ് കേസെടുത്തു. തൃക്കാക്കര പൊലീസിന് പുറമെ, തദ്ദേശ സ്വയംഭരണ വകുപ്പ് പ്രിന്സിപ്പല് സെക്രട്ടറിക്കും അദ്ദേഹം പരാതി നല്കിയിട്ടുണ്ട്. തനിക്ക് പൊലീസ് സംരക്ഷണം വേണമെന്നും അനില് പരാതിയില് ആവശ്യപ്പെട്ടിട്ടുണ്ട്.
അതേസമയം അനിലിന്റെ ആരോപണം നഗരസഭാ ചെയര്പേഴ്സണ് തള്ളി. അനാവശ്യ കാരണങ്ങള് പറഞ്ഞ് സെക്രട്ടറി ഫയലുകള് ഒപ്പിടുന്നില്ലെന്നും ഇതുമൂലം നഗരസഭയില് പ്ലാന് ഫണ്ട് പോലും വിനിയോഗിക്കാനാവുന്നില്ലെന്നും ചെയര്പേഴ്സണ് അജിത തങ്കപ്പന് പ്രതികരിച്ചു.
ഫയലുകളില് ഒപ്പിടണമെന്ന് മാത്രമാണ് പറഞ്ഞതെന്നും ഭീഷണിപ്പെടുത്തിയെന്ന ആരോപണം തെറ്റാണെന്നും അവര് പറഞ്ഞു. നഗരസഭയിലെ ക്രമക്കേടുകള്ക്കെതിരെ സെക്രട്ടറി ഫയലില് നോട്ട് എഴുതിയതാണ് ചെയര്പേഴ്സണെ ചൊടിപ്പിച്ചത്.