മാധ്യമപ്രവര്ത്തകര് വിമര്ശനങ്ങള്ക്ക് അതീതരാണ് എന്ന കാഴ്ചപ്പാടിനെ സ്വയം വിലയിരുത്തണമെന്ന് മുഖ്യമന്ത്രി പിണറായി വിജയന്. കേരള പത്രപ്രവര്ത്തക യൂണിയന് പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മാധ്യമങ്ങള് വിമര്ശിക്കപ്പെടുമ്പോഴും തെറ്റുകള് ചൂണ്ടി കാണിക്കുമ്പോഴും അവയെ ക്രിയാത്മകമായി ഉള്കൊള്ളാന് കഴിയണം. അഭിപ്രായ സ്വാതന്ത്ര്യത്തിനുമേല് വ്യക്തി സ്വാതന്ത്യത്തിലേക്ക് കൈ കടത്തുന്നില്ല എന്നത് ഉറപ്പ് വരുത്തുന്നതാണ് നീതിയുക്തമായ മാധ്യമപ്രവര്ത്തനം എന്ന ബോധ്യമുണ്ടാകണം. വിവാദ വ്യവസായമായി മാധ്യമപ്രവര്ത്തനം കൂപ്പുകുത്തുന്നില്ല എന്നത് ഉറപ്പ് വരുത്തണം.
നമ്മുടെ സാമൂഹിക സാമ്പത്തിക രാഷ്ട്രീയ മേഖലയുമുണ്ടാകുന്ന സംഭവവികാസങ്ങളെ കുറിച്ച് അര്ത്ഥവത്തായ സംവാദങ്ങള് നടത്തി അവയുടെ അടിസ്ഥാനത്തില് പ്രവര്ത്തനങ്ങള്ക്ക് വ്യക്തമായ ദിശാബോധം നല്കാന് കഴിയുന്ന തീരുമാനം കൈകൊള്ളാന് സമ്മേളനത്തിന് കഴിയണമെന്നും, മാധ്യമപ്രവര്ത്തകര് നേരിടുന്ന പ്രശ്നങ്ങള് സമയോചിതമായി പരിഹരിക്കുന്നതില് ആരോഗ്യകരമായ സമീപനമാണ് സര്ക്കാര് കൈകൊള്ളുന്നതതെന്നും’ മുഖ്യമന്ത്രി പറഞ്ഞു.
ജനാധിപത്യം ശക്തിപ്പെടുത്തുന്നതില് മാധ്യമങ്ങള് ചെലുത്തുന്ന സ്വാധീനം വളരെ വലുതാണെന്നും മാധ്യമങ്ങള്ക്കുള്ള സ്ഥാനം ഊട്ടി ഉറപ്പിക്കുന്നതാണ് നാലാം തൂണ് എന്ന പ്രയോഗം തന്നെയെന്നും മുഖ്യമന്ത്രി പിണറായി വിജയന്. ഇതിന്റെ അന്തസത്ത ഉള്കൊണ്ട് ജനാധിപത്യത്തെ സംരക്ഷിക്കാന് മാധ്യമങ്ങള്ക്ക് കഴിയണമെന്നും അദ്ദേഹം കൂട്ടിച്ചേര്ത്തു.
‘സ്വാതന്ത്ര്യം, ജനാധിപത്യം, പൗരാവകാശങ്ങള് എന്നിവ ഉറപ്പു വരുത്തി നാടിനുവേണ്ടി ത്യാഗോജ്ജലമായ പ്രവര്ത്തനങ്ങളാണ് ആദ്യകാല പത്രപ്രവര്ത്തകര് നടത്തിയിട്ടുള്ളത്. യഥാര്ത്ഥ പ്രശ്നങ്ങള് സമൂഹ മധ്യത്തില് കൊണ്ടുവരാനും അധികാരികളെ കൊണ്ട് അവ പരിഹരിച്ച് സമൂഹത്തെ മുന്നോട്ട് നയിക്കാനുമുള്ള ചുമതലയാണ് മാധ്യമങ്ങള്ക്കുള്ളത്.
മാധ്യമങ്ങളുടെ പ്രാരംഭ കാലവും വികാസവും ദേശീയ സ്വാതന്ത്ര്യ സമര കാലത്ത് ഗാന്ധിജി അടക്കമുള്ള പത്രാധിപന്മാര് ചെയ്തതും പരിശോധിച്ചാല് ഇവ ബോധ്യപ്പെടും. നിയന്ത്രണവും ജാഗ്രതയും ഉള്ള പത്രപ്രവര്ത്തന ശൈലിയായിരുന്നു അവരുടേത്. അലക്ഷ്യമായി ഒന്നും എഴുതില്ലെന്നും ദേഷ്യമോ വിദ്വേഷമോ തീര്ക്കാനും, വൈകാരിക വിസ്ഫോടനത്തിനായും പേന ചലിപ്പിക്കില്ലെന്നും ഉറപ്പ് വരുത്തിയിരുന്നു.’-മുഖ്യമന്ത്രി പറഞ്ഞു.