ഉമ്മന്ചാണ്ടി സര്ക്കാരിന്റെ കാലത്ത് ഒരു മന്ത്രി 26 തവണ വിദേശത്ത് പോയിരുന്നു എന്നും ഇതില് 12 തവണയും ഭാര്യ കൂടെയുണ്ടായിരുന്നുവെന്നുമുള്ള സിപിഎം നേതാവ് എകെ ബാലന്റെ ആരോപണത്തിന് മറുപടിയുമായി കോണ്ഗ്രസ് നേതാവ് കെ.സി ജോസഫ്. ഓലപ്പാമ്പിനെക്കാട്ടി ആരെയും ഭയപ്പെടുത്താന് നോക്കേണ്ടെന്നും ഭാര്യമാരെ കൂട്ടി വിദേശ യാത്ര പോയ മന്ത്രിമാര് ആരെന്ന് ബാലന് പറയണമെന്നും കെസി ജോസഫ് പറഞ്ഞു.
ഉമ്മന് ചാണ്ടി സര്ക്കാരിന്റെ കാലത്ത് സര്ക്കാര് ചെലവില് ഏതെല്ലാം മന്ത്രിമാര് എത്ര തവണ വിദേശയാത്ര നടത്തിയതെന്നും അവര് ഏതെല്ലാം തീയതികളില് ഏതെല്ലാം രാജ്യങ്ങളിലാണ് പോയതെന്നും ഏതെല്ലാം യാത്രകളില് ഭാര്യമാര് കൂടെയുണ്ടായിരുന്നു എന്നുമുള്ള കാര്യം ബാലന് വ്യക്തമാക്കണം. ഓലപ്പാമ്പിനെക്കാട്ടി ആരെയും ഭയപ്പെടുത്താന് ബാലന് നോക്കേണ്ട.
മുഖ്യമന്ത്രി പിണറായി വിജയന്റെയും സംഘത്തിന്റെയും വിദേശ യാത്ര സംബന്ധിച്ച് ഉണ്ടായ വിമര്ശനങ്ങള് ശരിയാണെന്ന് ബോധ്യമായതു കൊണ്ടാവാം ബാലന് പ്രത്യാരോപണങ്ങളുമായി ആ യാത്രയെ ന്യായീകരിക്കാന് ശ്രമിക്കുന്നതെന്നും കെസി ജോസഫ് പറഞ്ഞു.
കുടുംബത്തോടൊപ്പമുള്ള മുഖ്യമന്ത്രിയുടെ യുറോപ്യന് പര്യടനം സംബന്ധിച്ച് പ്രതിപക്ഷം ഉയര്ത്തിയ വിമര്ശനങ്ങള്ക്ക് മറുപടി പറഞ്ഞുകൊണ്ടാണ് മുന് മന്ത്രി എ കെ ബാലന് ഉമ്മന് ചാണ്ടി സര്ക്കാറിന്റെ കാലത്ത് ഒരു മന്ത്രി ഇരുപത്തിമൂന്ന് തവണയും മറ്റൊരു മന്ത്രി പതിനാറു തവണയും വിദേശയാത്ര നടത്തിയെന്നും അതില് പന്ത്രണ്ട് തവണയും ഭാര്യമാര് കൂടെ ഉണ്ടായിരുന്നു എന്നും ആരോപിച്ചത്.