തൃശൂര് മേയര് എംകെ വര്ഗീസിനെതിരെ രൂക്ഷ വിമര്ശനവുമായി സിപിഐ നേതാവ് വിഎസ് സുനില്കുമാര്. ലോക്സഭ തിരഞ്ഞെടുപ്പില് എന്ഡിഎ സ്ഥാനാര്ത്ഥി സുരേഷ്ഗോപിയ്ക്ക് വേണ്ടിയാണ് എംകെ വര്ഗീസ് പ്രവര്ത്തിച്ചതെന്ന് സുനില്കുമാര് പറഞ്ഞു. കഴിഞ്ഞ തിരഞ്ഞെടുപ്പില് ഇടതുപക്ഷ മേയര് എന്ന നിലയില് സുനില്കുമാര് പ്രവര്ത്തിച്ചിട്ടില്ലെന്നും സുനില് കുമാര് കൂട്ടിച്ചേര്ത്തു.
വര്ഗീസിനെ മേയര് സ്ഥാനത്ത് നിന്ന് മാറ്റണം. ഇടതുപക്ഷത്തെ സഹായിക്കുന്ന ഒരു നിലപാടും വര്ഗീസില് നിന്ന് ഉണ്ടായിട്ടില്ല. മേയറുടെ പേരില് ഇടതുപക്ഷ ഐക്യം തകര്ക്കാന് ആഗ്രഹിക്കുന്നില്ലെന്നും സുനില്കുമാര് പറഞ്ഞു. ആയിരക്കണക്കിന് കോടിയുടെ വികസനം നടത്തിയിട്ടുള്ള താന് മത്സരിക്കുമ്പോള് അതുപറയാതെ വര്ഗീസ് സുരേഷ്ഗോപിയുടെ മഹിമ പറഞ്ഞുവെന്നും സുനില് കുമാര് ആരോപിച്ചു.
നേരത്തെ സിപിഐ ജില്ലാ സെക്രട്ടറിയും എംകെ വര്ഗീസിനെതിരെ പരസ്യമായി നിലപാടെടുത്ത് രംഗത്തെത്തിയിരുന്നു. തൃശൂര് മേയര് പദവി ഒഴിയണമെന്നായിരുന്നു ജില്ലാ സെക്രട്ടറി കെകെ വത്സരാജ് ആവശ്യപ്പെട്ടത്. മേയര് സുരേഷ്ഗോപിയെ പുകഴ്ത്തുന്നത് തുടര്ന്നുകൊണ്ടേയിരിക്കുന്നുവെന്നും നിലപാട് തിരുത്താന് തയ്യാറാകണമെന്നും വത്സരാജ് ആവശ്യപ്പെട്ടിരുന്നു.