തിരുവനന്തപുരത്ത് കാറിനുള്ളിൽ യുവാവിന്റെ മൃതദേഹം കഴുത്തറത്ത നിലയിൽ കണ്ടെത്തി. മലയൻകീഴ് സ്വദേശി ദീപുവാണ് മരിച്ചതെന്ന് പൊലീസ് അറിയിച്ചു. അതേസമയം ദീപുവിന്റെ കൈയിലുണ്ടായിരുന്ന 10 ലക്ഷം കാണാനില്ലെന്നും റിപ്പോർട്ടുണ്ട്. 10 ലക്ഷം രൂപയുമായി കോയമ്പത്തൂരിലേക്ക് പോയതാണ് ദീപുവെന്നാണ് വീട്ടുകാരുടെ മൊഴി.
ഇന്നലെ രാത്രി 11.45നാണ് കളിയിക്കാവിളയിൽ തമിഴ്നാട് പൊലീസിന്റെ പട്രോളിങ്ങിനിടെ മൃതദേഹം കണ്ടെത്തിയത്. വാഹനം ലൈറ്റിട്ട് കിടക്കുന്നത് കണ്ട പൊലീസ് പരിശോധന നടത്തുന്നതിനിടയിലാണ് മൃദദേഹം കണ്ടെത്തിയത്. കാറിൻ്റെ ഡിക്കി തുറന്നു കിടക്കുകയായിരുന്നുവെന്നും കഴുത്ത് 70 ശതമാനവും അറുത്തനിലയിലായിരുന്നുവെന്നും പൊലീസ് പറഞ്ഞു.
അതേസമയം ദീപുവിന്റെ മൃതദേഹം കുഴിത്തറ ജനറൽ ആശുപത്രിയിലേക്ക് മാറ്റി. സംഭവത്തിൽ പൊലീസ് അന്വേഷണം ആരംഭിച്ചു. മോഷണ ശ്രമത്തിനിടെയുള്ള കൊലപാതകമാവാം എന്നാണ് പൊലീസ് സംശയിക്കുന്നത്. തക്കല എസ്പിയുടെ നേതൃത്വത്തിലാണ് അന്വേഷണം പുരോഗമിക്കുന്നത്. ദീപുവിന് തിരുവനന്തപുരം മലയത്ത് ക്രഷർ യൂണിറ്റുണ്ട്. പുതിയ ക്രഷർ തുടങ്ങുന്നതിനായി ജെസിബിയും മറ്റും വാങ്ങുന്നതിന് 10 ലക്ഷം രൂപയുമായി കോയമ്പത്തൂരിലേക്ക് പോയതാണെന്ന് വീട്ടുകാർ അറിയിച്ചു.