താനൂര് ഒട്ടുംപുറം തൂവല് തീരത്ത് വിനോദയാത്രാ ബോട്ട് മറിഞ്ഞ് മരിച്ചവരില് ഏഴ് കുട്ടികളും. ഒരു കുടുംബത്തിലെ 12 പേരുമെന്ന് വിവരം. ഇതുവരെ 22 പേരുടെ മൃതദേഹങ്ങളാണ് കണ്ടെത്തിയിരിക്കുന്നത്. പരുക്കേറ്റ 9 പേര് ചികിത്സയിലാണ്.
രാവിലെ ആറ് മണിക്ക് തന്നെ ഇന്ക്വസ്റ്റ് നടപടികള് തുടങ്ങിയിരുന്നു. തിരൂരങ്ങാടി താലൂക്ക് ആശുപത്രി, പെരിന്തല്മണ്ണ താലൂക്ക് ആശുപത്രി എന്നിങ്ങനെ അഞ്ച് കേന്ദ്രങ്ങളിലാണ് പോസ്റ്റ്മോര്ട്ടം നടപടിക്രമങ്ങള് പുരോഗമിക്കുന്നത്.
പരപ്പനങ്ങാടി-താനൂര് നഗരസഭാ അതിര്ത്തിയില് പൂരപ്പുഴയിലാണ് അപകടമുണ്ടായ ഒട്ടുംപുറം തൂവല് തീരം. ഒരു മാസം മുമ്പാണ് പ്രദേശത്ത് ബോട്ട് സര്വീസ് തുടങ്ങിയത്. അമിതഭാരമാണ് അപകടകാരണമായതെന്നാണ് പ്രാഥമിക നിഗമനം.
സുരക്ഷാ സംവിധാനങ്ങള് പാലിക്കുന്നതിലുണ്ടായ ഗുരുതര വീഴ്ച മരണസംഖ്യ ഉയരാന് കാരണമായെന്നാണ് വിലയിരുത്തല്. ബോട്ടിന്റെ സമയക്രമവും ദുരന്തത്തിന്റെ വ്യാപ്തി കൂട്ടി. വൈകിട്ട് അഞ്ച് മണിക്ക് ശേഷം സാധാരണ യാത്രാ ബോട്ടുകള് സര്വീസ് നടത്താറില്ല. എന്നാല് അപകടത്തില്പ്പെട്ട ബോട്ട് ഇന്നലെ വൈകിട്ട് അഞ്ച് മണിക്ക് ശേഷമാണ് യാത്ര തിരിച്ചത്.
ബോട്ടില് എത്ര യാത്രക്കാരാണ് ഉണ്ടായിരുന്നത് എന്ന കാര്യത്തില് വ്യക്തത ഉണ്ടായിട്ടില്ല.