ഓണ്ലൈന് ഭക്ഷണ വിതരണ കമ്പനിയായ സ്വിഗ്ഗിയുടെ ജീവനക്കാരുടെ അനിശ്ചിതകാല സമരം തുടങ്ങി. മതിയായ വേതനം ലഭിക്കാത്തതും തൊഴില് ചൂഷണവും ആരോപിച്ചാണ് സമരം. ലേബര് കമ്മീഷണര് സമരക്കാരുമായി ഇന്ന് ചര്ച്ച നടത്തും. സ്വിഗ്ഗി കമ്പനിയുമായി ശനിയാഴ്ച ചര്ച്ച നടത്തിയിരുന്നുവെങ്കിലും ഇത് പരാജയപ്പെട്ടതോടെയാണ് വിതരണക്കാര് സമരം പ്രഖ്യാപിച്ചത്.
വിതരണത്തിന് നിരക്ക് ഉയര്ത്തണമെന്നും തേര്ഡ് പാര്ട്ടി കമ്പനിക്ക് ഡെലിവറി അനുമതി നല്കിയ തീരുമാനം പിന്വലിക്കണമെന്നുമാണ് സമരക്കാരുടെ ആവശ്യം. വളരെ തുച്ഛമായ തുകയാണ് വിതരണക്കാര്ക്ക് ലഭിക്കുന്നതെന്നാണ് ആരോപണം. നാല് കിലോമീറ്റര് അകലേക്ക് ഭക്ഷണം എത്തിക്കുന്ന ജീവനക്കാരന് ലഭിക്കുന്നത് 20 രൂപ മാത്രമാണ്. എട്ട് കിലോമീറ്റര് ജീവനക്കാര് സഞ്ചരിക്കേണ്ടതുണ്ട്. അതിനാല് നിരക്ക് 20 രൂപയില് നിന്ന് 35 രൂപയാക്കണമെന്നാണ് ജീവനക്കാര് ആവശ്യപ്പെടുന്നത്.
പത്ത് കിലോമീറ്റര് ദൂരം സഞ്ചരിച്ച് ഭക്ഷണം എത്തിച്ചാല് 50 രൂപയാണ് ഇവര്ക്ക് ലഭിക്കുക. തിരികെ വരുന്ന പത്ത് കിലോമീറ്റര് കൂടി കണക്കിലെടുത്താല് കിലോമീറ്ററിന് മൂന്ന് രൂപ പോലും കിട്ടാത്ത അവസ്ഥയാണെന്ന് ഇവര് പറയുന്നു.
സ്വിഗ്ഗി കേരള സോണ് മേധാവികള് വിതരണക്കാരുമായി ചര്ച്ച നടത്തിയെങ്കിലും തീരുമാനമായില്ല. കഴിഞ്ഞ ഒക്ടോബറിലും ജീവനക്കാര് ഈ ആവശ്യവുമായി സമരം നടത്തിയിരുന്നു. രണ്ടാഴ്ചയ്ക്കുള്ളില് പ്രശ്നം പരിഹരിക്കാമെന്ന ഉറപ്പിലാണ് അന്ന് സമരം പിന്വലിച്ചത്. എന്നാല് ഇത് പാലിക്കപ്പെട്ടില്ല. തേര്ഡ് പാര്ട്ടി ആപ്ലിക്കേഷന് സ്വിഗ്ഗി ഡെലിവറി അനുമതി നല്കിയതും വിതരണക്കാര്ക്ക് തിരിച്ചടിയായി.
സ്വിഗ്ഗി വിതരണക്കാര്ക്ക് നല്കുന്നതിലും ഇരട്ടി പ്രതിഫലം ഇവര്ക്ക് നല്കുന്നുവെന്നും ഉപഭോക്താക്കളില് നിന്ന് വാങ്ങുന്ന അധിക തുക വിതരണക്കാര്ക്ക് ലഭിക്കുന്നില്ലെന്നും പരാതികളുണ്ട്.