പൊലീസ് യു.എ.പി.എ ചുമത്തി അറസ്റ്റ് ചെയ്ത യുവാക്കള്ക്ക് മാവോവാദി ബന്ധമുണ്ടെന്ന് സി.പി.എം. കോഴിക്കോട്ടെ ലോക്കല് കമ്മിറ്റികളില് പാര്ട്ടി ഇക്കാര്യം റിപ്പോര്ട്ട് ചെയ്തിട്ടുണ്ട്. യുവാക്കളുടെ രാഷ്ട്രീയ വ്യതിയാനം മനസ്സിലാക്കാന് കഴിയാതെ പോയത് സ്വയം വിമര്ശനമായി കരുതണമെന്നും സി.പി.എം ലോക്കല് കമ്മിറ്റികളില് സമര്പ്പിച്ച റിപ്പോര്ട്ടുകളില് പറയുന്നു.
യുവാക്കളെ യു.എ.പി.എ ചുമത്തി അറസ്റ്റ് ചെയ്തത് സംസ്ഥാനത്താകെ ചര്ച്ചാവിഷയമായതിന്റെ പിന്നാലെയാണ് ജില്ലയില് അടിയന്തരമായി ലോക്കല് കമ്മിറ്റി യോഗങ്ങള് വിളിച്ചു ചേര്ത്തത്. തിങ്കളാഴ്ചയാണ് അലന് ഷുഹൈബ് അംഗമായ മീഞ്ചന്ത ബ്രാഞ്ച് ഉള്പ്പെടുന്ന പന്നിയങ്കര ലോക്കല് കമ്മിറ്റി യോഗം ചേര്ന്നത്. ഈ യോഗത്തില് അറസ്റ്റിലായ രണ്ടുപേര്ക്കും മാവോവാദി ബന്ധമുണ്ടെന്ന് സ്ഥിരീകരിക്കുന്ന റിപ്പോര്ട്ടാണ് സി.പി.എം നല്കിയിരിക്കുന്നത്. യുവാക്കള്ക്കുണ്ടായ രാഷ്ട്രീയ വ്യതിയാനം മനസ്സിലാക്കുന്നതില് പാര്ട്ടി പരാജയം സംഭവിച്ചെന്നും ഇക്കാര്യത്തില് ആത്മപരിശോധന വേണമെന്നും റിപ്പോര്ട്ടില് പറയുന്നു
അറസ്റ്റിലായ രണ്ടുപേരേയും തെറ്റുതിരുത്തി പാര്ട്ടിക്കൊപ്പം നിര്ത്താന് തിരിച്ചു വരാനുള്ള അവസരം പാര്ട്ടി നല്കണമെന്ന അഭിപ്രായവും ലോക്കല് കമ്മിറ്റി യോഗത്തിലുണ്ടായി. ബുധനാഴ്ച് അലന്റെയും താഹയുടെയും ജാമ്യാപേക്ഷ ഹൈക്കോടതി പരിഗണിക്കും. .