പെരിയാറില് മത്സ്യങ്ങള് ചത്തുപൊങ്ങിയ സംഭവത്തില് ഏതെങ്കിലും സ്ഥാപനത്തിന്റെ പങ്കുതെളിഞ്ഞാല് അത് അടച്ചുപൂട്ടാന് നിര്ദേശിച്ചിട്ടുണ്ടെന്ന് മന്ത്രി പി രാജീവ്. സിസിടിവി ക്യാമറ ദൃശ്യങ്ങള് ഉള്പ്പെടെ പരിശോധിക്കുന്നുണ്ട്. ഇതില് സ്ഥാപത്തിന് പങ്കുണ്ടെന്ന് തെളിഞ്ഞാല് സ്ഥാപനം അടച്ചുപൂട്ടുന്നതടക്കമുള്ള നടപടികള് അടിയന്തരമായി സ്വീകരിക്കാന് മലിനീകരണ നിയന്ത്രണ ബോര്ഡ് എന്വയോണ്മെന്റല് എന്ജിനീയറോട് നിര്ദേശിച്ചിട്ടുണ്ട്.
ഉത്തരവാദ നിക്ഷേപം, ഉത്തരവാദ വ്യവസായം എന്നതാണ് സര്ക്കാരിന്റെ നയം. ഷട്ടറുകള് തുറക്കുമ്പോള് കര്ശനമായ പ്രോട്ടോക്കോള് പാലിക്കേണ്ടതുണ്ട്. ഏതെങ്കിലും സ്ഥാപനങ്ങള് തെറ്റായി പ്രവര്ത്തിച്ചിട്ടുണ്ടോയെന്ന് റിപ്പോര്ട്ടിന്റെ അടിസ്ഥാനത്തില് മാത്രമേ പറയാന് കഴിയൂ.
വിഷയത്തില് അടിയന്തര അന്വേഷണം നടത്താന് ജില്ലാ കലക്ടര്ക്ക് നിര്ദേശം നല്കിയിട്ടുണ്ട്. രാസമാലിന്യം കലര്ന്നിട്ടുണ്ടോ എന്നതടക്കം പരിശോധിക്കും. എത്രയും വേഗം റിപ്പോര്ട്ട് നല്കാന് നിര്ദേശിച്ചിട്ടുണ്ട്. കാരണം എന്താണെന്ന് പരിശോധിക്കുന്നതിനൊപ്പം ഇത് ആവര്ത്തിക്കാതിരിക്കാന് ആവശ്യമായ നടപടിയെടുക്കും. ജലത്തിന്റെയും ചത്തമത്സ്യങ്ങളുടേയും സാംപിളുകള് മലിനീകരണ നിയന്ത്രണ ബോര്ഡ് ശേഖരിച്ച് കുഫോസ് സെന്ട്രല് ലാബിലേക്ക് അയച്ചിട്ടുണ്ട്. പരിശോധനാ ഫലത്തിന്റെ അടിസ്ഥാനത്തില് തുടര്നടപടിയുണ്ടാകുമെന്നും അദേഹം പറഞ്ഞു.