ആരോഗ്യവകുപ്പ് ജോയിന്റ് സെക്രട്ടറി ശ്രീറാം വെങ്കിട്ടരാമന് വിവാഹിതനാകുന്നു. ആലപ്പുഴ ജില്ലാ കളക്ടര് രേണു രാജാണ് വധു. അടുത്ത ഞായറാഴ്ചയാണ് വിവാഹം. ചോറ്റാനിക്കര ദേവീക്ഷേത്രത്തില് വെച്ചാണ് വിവാഹം നടത്തുന്നതെന്നാണ് വിവരം. അടുത്ത ബന്ധുക്കള് മാത്രമേ ചടങ്ങില് പങ്കെടുക്കൂ.
എംബിബിഎസ് ബിരുദം പൂര്ത്തിയാക്കിയതിന് ശേഷമാണ് ശ്രീറാം വെങ്കിട്ടരാമനും രേണു രാജും സിവില് സര്വീസില് പ്രവേശിക്കുന്നത്. 2012ല് രണ്ടാം റാങ്കോടെയാണ് ശ്രീറാം സിവില് സര്വീസ് പരീക്ഷയില് വിജയിച്ചത്.
നേരത്തെ ദേവികുളം സബ് കളക്ടറായിരുന്നപ്പോള് കൈയേറ്റം ഒഴിപ്പിക്കലിനായി ശ്രീറാം വെങ്കിട്ടരാമന് സ്വീകരിച്ച നടപടികള് ഏറെ ശ്രദ്ധനേടിയിരുന്നു. പിന്നീട് ഇതേ പദവിയില് എത്തിയ രേണുരാജും കൈയ്യേറ്റക്കാര്ക്ക് എതിരെ കര്ശന നിലപാടുകളാണ് എടുത്തത്. ഇതും വാര്ത്തകളില് ഇടം നേടിയിരുന്നു.
അതേ സമയം ദേവികുളം സബ്കളക്ടറായിരക്കുമ്പോള് 2019ല് ശ്രീറാം ഓടിച്ച വാഹനം ഇടിച്ച് മാധ്യമപ്രവര്ത്തകന് കെഎം ബഷീര് മരിച്ച സംഭവം ഏറെ വിവാദമായി മാറുകയും വ്യാപക പ്രതിഷേധങ്ങള് ഉയരുകയും ചെയ്തിരുന്നു. ഇതേ തുടര്ന്ന് സസ്പെന്ഷനിലായ ശ്രീറാം വെങ്കിട്ടരാമനെ 2020 മാര്ച്ചിലാണ് തിരിച്ചെടുത്തത്. പിന്നീട് ആരോഗ്യ വകുപ്പ് ജോയിന്റ് സെക്രട്ടറിയായും, കേരള മെഡിക്കല് സര്വീസസ് കോര്പറേഷന് എംഡിയായും നിയമിക്കുകയായിരുന്നു.