സംസ്ഥാനത്ത് ചൂട് ക്രമാധീതമായി വര്ദ്ധിക്കുന്ന സാഹചര്യത്തില് തൊഴില് സമയത്തില് പുനക്രമീകരണം. സൂര്യാഘാത സാധ്യത കണക്കിലെടുത്താണ് തീരുമാനം. രാവിലെ 7:00 മുതല് വൈകുന്നേരം 7:00 മണി വരെയുള്ള സമയത്തില് എട്ട് മണിക്കൂറായി ജോലി സമയം നിജപ്പെടുത്തിയിട്ടുണ്ട്.
പുറത്ത് ജോലി നോക്കുന്ന താഴിലാളികളുടെ ജോലി സമയം മെയ് 10 വരെയാണ് പുനക്രമീകരിച്ചിരിക്കുന്നത്. പകല് സമയം ജോലി ചെയ്യുന്ന എല്ലാ തൊഴിലാളികള്ക്കും ഉച്ചയ്ക്ക് 12 മുതല് വൈകുന്നേരം മൂന്ന് മണിവരെ വിശ്രമവേളയായിരിക്കും. ഷിഫ്റ്റ് വ്യവസ്ഥയില് ജോലി ചെയ്യുന്ന തൊഴിലാളികള്ക്ക് ഷിഫ്റ്റുകള് ഉച്ചയ്ക്ക് 12:00 മണിക്ക് അവസാനിക്കുന്ന തരത്തിലും വൈകുന്നേരം 3:00 മണിക്ക് ആരംഭിക്കുന്ന തരത്തിലുമാണ് പുനക്രമീകരണം.
ജില്ലാ ലേബര് ഓഫീസര്, ഡെപ്യൂട്ടി ലേബര് ഓഫീസര്, അസി ലേബര് ഓഫീസര് എന്നിവരുടെ മേല് നോട്ടത്തില് പ്രത്യേക ടീമുകള് രൂപീകരിച്ചു ദൈനംദിന പരിശോധന നടത്തും. കണ്സ്ട്രക്ഷന്, റോഡ് നിര്മാണ മേഖലകള്ക്ക് പ്രത്യേക പരിഗണന നല്കി പരിശോധന ഉറപ്പാക്കുമെന്നും കമ്മിഷണര് അറിയിച്ചു.
സമുദ്രനിരപ്പില് നിന്ന് 3000 അടിയില് കൂടുതല് ഉയരമുള്ള സൂര്യാഘാതത്തിന് സാദ്ധ്യതയില്ലാത്ത മേഖലകളെ ഈ ഉത്തരവിന്റെ പരിധിയില് നിന്ന് ഒഴിവാക്കിയിട്ടുണ്ട്.