ഇന്നു മുതൽ സംസ്ഥാനത്തെ റേഷൻ കടകൾ തുറന്നു പ്രവർത്തിക്കുമെന്ന് അധികൃതർ അറിയിച്ചു. സാങ്കേതിക തകരാറു മൂലമാണ് കഴിഞ്ഞ മൂന്നു ദിവസങ്ങളായി റേഷൻ കടകൾ അടച്ചിട്ടത്. തകരാർ പരിഹരിച്ച് ഇ-പോസ് സംവിധാനം വഴിയുള്ള റേഷൻ വിതരണം സുഗമമാക്കിയിട്ടുണ്ട്. ഈ മാസത്തെ റേഷൻ വിതരണത്തിനുള്ള സമയം അഞ്ചാം തിയതി വരെ നീട്ടി. റേഷൻ വിതരണം തടസ്സപ്പെട്ട സാഹചര്യത്തിലാണ് പുതിയ തീരുമാനം.
മലപ്പുറം, തൃശ്ശൂര്, പാലക്കാട്, കൊല്ലം, ആലപ്പുഴ, പത്തനംതിട്ട, വയനാട് ജില്ലകളിൽ ഇന്ന് രാവിലെ 8 മണി മുതല് 1 മണി വരെ റേഷൻ വിതരണം ചെയ്യും.ഉച്ചയ്ക്ക് ശേഷം ശേഷം 2 മണി മുതല് 7 മണി വരെ എറണാകുളം, കോഴിക്കോട്, തിരുവനന്തപുരം, കണ്ണൂര്, കോട്ടയം, കാസര്ഗോഡ്, ഇടുക്കി ജില്ലകളിൽ റേഷൻ വിതരണം നടത്തും. മെയ് രണ്ട്, മൂന്ന് തീയതികളും ഇതേ രീതി തുടരും. മെയ് നാലിനും അഞ്ചിനും റേഷൻ കടകൾ സാധാരണ പോലെ പ്രവർത്തിക്കും.
മെയ് 6 മുതലാകും മെയ് മാസത്തെ റേഷൻ വിതരണം തുടങ്ങുകയെന്ന് ഭക്ഷ്യ മന്ത്രി ജി ആർ അനിൽ അറിയിച്ചു.ഇ-പോസ് മുഖേനയുള്ള റേഷന് വിതരണം സൂക്ഷ്മമായി നിരീക്ഷിക്കും. പ്രശ്നങ്ങള് ഉണ്ടായാൽ അടിയന്തരമായ ഇടപെടല് നടത്തുന്നതിന് പൊതുവിതരണ വകുപ്പിലെ ജില്ലാ സപ്ലൈ ഓഫീസര് അടക്കമുള്ള മുഴുവന് ഉദ്യോഗസ്ഥരും ഫീല്ഡില് ഉണ്ടാകുമെന്നും മന്ത്രി അറിയിച്ചു.