എറണാകുളത്ത് ക്ഷേത്രക്കുളത്തില് കുളിക്കാനിറങ്ങിയ പൊലീസ് ഉദ്യോഗസ്ഥന് മുങ്ങി മരിച്ചു. തൃപ്പൂണ്ണിത്തുറ എആര് ക്യാമ്പിലെ പൊലീസ് ഉദ്യോഗസ്ഥനും അങ്കമാലി സ്വദേശിയുമായ ശ്രീജിത്താണ് മരിച്ചത്. ചൊവ്വാഴ്ച വൈകുന്നേരം ആയിരുന്നു സംഭവം നടന്നത്. എആര് ക്യാമ്പിന് സമീപത്തെ പെരുന്നിനാക്കുളം ക്ഷേത്രക്കുളത്തിലായിരുന്നു അപകടം.
ശ്രീജിത്ത് വൈകുന്നേരത്തോടെ സഹപ്രവര്ത്തകര്ക്കൊപ്പം ക്ഷേത്രക്കുളത്തില് കുളിക്കാനെത്തിയതായിരുന്നു. ശ്രീജിത്തും മറ്റൊരു സഹപ്രവര്ത്തകനും നീന്തുന്നതിനിടെ മുങ്ങിപ്പോയിരുന്നു. എന്നാല് ശ്രീജിത്തിനൊപ്പമുണ്ടായിരുന്നയാള് നീന്തി കരയ്ക്ക് കയറിയെങ്കിലും ശ്രീജിത്തിന് രക്ഷപ്പെടാനായില്ല.
തുടര്ന്ന് സഹപ്രവര്ത്തകര് അഗ്നിശമന സേനയെ വിവരം അറിയിച്ചു. അഗ്നിശമന സേന സ്ഥലത്തെത്തി നടത്തിയ തിരച്ചിലിലാണ് ശ്രീജിത്തിന്റെ മൃതദേഹം കണ്ടെത്താനായത്. മൃതദേഹം തൃപ്പൂണ്ണിത്തുറ താലൂക്ക് ആശുപത്രിയിലേക്ക് മാറ്റിയിട്ടുണ്ട്. മൃതദേഹം പോസ്റ്റുമോര്ട്ടത്തിന് ശേഷം ബന്ധുക്കള്ക്ക് വിട്ടുനല്കും.