സംസ്ഥാനത്തെ പ്ലസ് വണ് പ്രവേശനത്തിനായുള്ള ട്രയല് അലോട്ട്മെന്റിന്റെ സമയം നീട്ടി. നാളെ വൈകിട്ട് അഞ്ചുമണിവരെയാണ് സമയം നീട്ടി നല്കിയിരിക്കുന്നത്. അലോട്ട്മെന്റ് പരിശോധിച്ച് തിരുത്തലുകള് വരുത്താനും ഓപ്ഷനുകള് കൂട്ടിച്ചേര്ക്കാനും കൂടുതല് സമയം അനുവദിക്കണമെന്ന് വിദ്യാര്ത്ഥികളും രക്ഷിതാക്കളും ആവശ്യപ്പെട്ടിരുന്നു. ഇതേ തുടര്ന്നാണ് നടപടിയെന്ന് വിദ്യാഭ്യാസ മന്ത്രി വി ശിവന്കുട്ടി അറിയിച്ചു.
അലോട്ട്മെന്റ് പരിശോധിക്കുന്നതിനുള്ള സമയം ഇന്ന് അവസാനിക്കുമെന്നാണ് നേരത്തെ അറിയിച്ചിരുന്നത്. വെള്ളിയാഴ്ച്ച രാവിലെയാണ് ട്രയല് അലോട്ട്മെന്റ് ലിസ്റ്റ് പ്രസിദ്ധീകരിച്ചത്. എന്നാല് അലോട്ട്മെന്റ് പ്രസിദ്ധീകരിച്ച വെബ്സൈറ്റില് തകരാറ് സംഭവിച്ചതിനെ തുടര്ന്ന് ആദ്യ ദിവസം വിദ്യാര്ത്ഥികള്ക്ക് അലോട്ട്മെന്റ് പരിശോധിക്കാന് കഴിഞ്ഞിരുന്നില്ല.
ഒരുപാട് പേര് ഒരേ സമയം സൈറ്റിലേക്ക് പ്രവേശിച്ചതാണ് പ്രശ്നത്തിന് കാരണമെന്നാണ് അധികൃതരുടെ വിശദീകരണം. പിന്നീട് വെബ്സൈറ്റ് ശരിയായെങ്കിലും ട്രയല് അലോട്ട്മെന്റ് പരിശോധിക്കാനുള്ള തിയതി നീട്ടി നല്കണമെന്ന് വിദ്യാര്ത്ഥികള് ആവശ്യപ്പെടുകയായിരുന്നു.
ആഗസ്റ്റ് മൂന്നിനാണ് ആദ്യഘട്ട അലോട്ട്മെന്റ്. ആഗസ്റ്റ് 22ന് ക്ലാസ് ആരംഭിക്കാനാണ് നിലവില് തീരുമാനിച്ചിരിക്കുന്നത്. സിബിഎസ്ഇ പത്താം ക്ലാസ് ഫലം വൈകിയതാണ് പ്ലസ് വണ് പ്രവേശനത്തിന്റെ നടപടികള് വൈകാനിടയാക്കിയത്.