മുഖ്യമന്ത്രി പിണറായി വിജയന്‍ നടത്തിയ നവകേരള യാത്രക്കായി തയാറാക്കി ശേഷം കോഴിക്കോട്-ബംഗളൂരു റൂട്ടില്‍ സര്‍വീസ് നടത്തിരുന്ന നവകേരള ബസ് വീണ്ടും കട്ടപ്പുറത്തായി. കഴിഞ്ഞ കുറെ ദിവസങ്ങളായി ഒരാള്‍ പോലും ബസില്‍ ടിക്കറ്റ് എടുക്കാത്തതിനെ തുടര്‍ന്നാണ് സര്‍വീസ് താല്‍ക്കാലികമായി അവസാനിപ്പിച്ചിരിക്കുന്നത്. നിലവില്‍ ബസ് കോഴിക്കോട് റീജിയണല്‍ വര്‍ക്ക്ഷോപ്പില്‍ കയറ്റി ഇട്ടിരിക്കുകയാണ്.
രണ്ടാഴ്ച്ച മുമ്പ് ചില ദിവസങ്ങളില്‍ നാമമാത്രമായ ആള്‍ക്കാരുമായിട്ടായിരുന്നു സര്‍വീസ്. ഇതോടെ കനത്ത നഷ്ടമായി. തുടര്‍ന്ന് സര്‍വീസ് അവസാനിപ്പിച്ച് ബസ് വര്‍ക്ക്ഷോപ്പിലേക്ക് മാറ്റുകയായിരുന്നു.
എയര്‍ കണ്ടീഷന്‍ ചെയ്ത ബസില്‍ 26 പുഷ് ബാക്ക് സീറ്റാണുള്ളത്. സെസ് അടക്കം 1171 രൂപയാണ് ടിക്കറ്റ് നിരക്ക്. ശുചിമുറി, ഹൈഡ്രോളിക് ലിഫ്റ്റ്, വാഷ്ബേസിന്‍, ടെലിവിഷന്‍, മ്യൂസിക് സിസ്റ്റം, മൊബൈല്‍ ചാര്‍ജര്‍ സൗകര്യങ്ങള്‍ക്കുപുറമേ ലഗേജും സൂക്ഷിക്കാനാവും.
സംസ്ഥാന സര്‍ക്കാര്‍ സംഘടിപ്പിച്ച നവകേരള സദസില്‍ പങ്കെടുക്കാന്‍ മുഖ്യമന്ത്രി പിണറായി വിജയന്‍ അടക്കമുള്ള മന്ത്രിസംഘം സഞ്ചരിച്ച ബസ് കഴിഞ്ഞ മേയ് അഞ്ച് തൊട്ടാണ് കോഴിക്കോട് – ബംഗളൂരു റൂട്ടില്‍ സര്‍വീസ് തുടങ്ങിയത്.സര്‍വീസ് ഉദ്ഘാടനം ചെയ്ത വേളയില്‍ കയറാന്‍ ആള്‍ക്കാര്‍ ഉണ്ടായിരുന്നെങ്കിലും പിന്നീട് സ്ഥിതി മാറി. യാത്രക്കാര്‍ ഈ സര്‍വീസിനോട് മുഖം തിരിക്കുകയായിരുന്നു.
