മഴക്കാലമായതോടെ ശക്തമായതോടെ സംസ്ഥാനത്തിൻ്റെ പല ജില്ലകളിലും സാഹചര്യങ്ങൾ നോക്കി കലക്ടർമാർ അവധി പ്രഖ്യാപിക്കാറുണ്ട്. ശക്തമായ മഴയിലെ അപകട സാധ്യത കൂടി മുന്നിൽകണ്ടാണ് കലക്ടർമാർ അവധി പ്രഖ്യാപിക്കുന്നത്. ഇത് അവധിക്കാലമായതിനാൽ തന്നെ ഇപ്പോൾ കുട്ടികൾ ട്യൂഷനും മദ്രസയിലും മറ്റു ക്ലാസുകളിലുമൊക്കെ പോകാറുണ്ട്. അവർക്ക് അവധിയും ലഭിക്കാറുണ്ട്.
എന്നാൽ ഇപ്പോഴിതാ പത്തനംതിട്ട കളക്ടർ പ്രേം കൃഷ്ണൻ തന്റെ ഇൻസ്റ്റഗ്രാമിലൂടെ പങ്കുവച്ച സ്റ്റോറിയാണ് ശ്രദ്ധനേടുന്നത്. മഴക്കാലമായാൽ കലക്ടർമാർക്ക് പേഴ്സണൽ മെസേജ് അയക്കുന്ന വിരുതന്മാരിലൊരാളെ പൊക്കിയിരിക്കുകയാണ് കളക്ടർ. അവധി ചോദിച്ച വിദ്യാർത്ഥിയോട് സ്കൂളിൽ പോകാനാണ് കളക്ടർ പറയുന്നത്. കളക്ടർ തന്നെയാണ് ഇക്കാര്യം ഇൻസ്റ്റഗ്രാം സ്റ്റോറിയായി പങ്കുവെച്ചതും.
ഇൻസ്റ്റഗ്രാം ചാറ്റിലൂടെയാണ് ഈ വിരുതൻ അവധി ചോദിച്ച് രംഗത്ത് എത്തിയത്. അതിലാകട്ടെ അക്ഷരത്തെറ്റുകളുടെ കൂമ്പാരവും. ‘കടുത്ത മഴ ആയതിനാൽ ദയവായി ഒരു ആവുധി പ്രേക്യപിക്കുവാൻ അപേക്ഷിക്കുന്നു”-എന്നാണ് വിരുതൻ പറയുന്നത്. കലക്ടർ ആ അപേക്ഷക്ക് മറുപടി കൊടുക്കുകയും ചെയ്തു. അത് ഇങ്ങനെ; “അവധി ചോദിക്കാതെ സ്ഥിരമായി സ്കൂളിൽ പോകുക, പ്രത്യേകിച്ച് മലയാളം ക്ലാസിൽ കേറാൻ ശ്രമിക്കുക. ഇന്ന് അവധി ഇല്ല. നന്ദി. എന്നാണ് കളക്ടർ കുറിച്ചത്.