ലോക്‌സഭ തിരഞ്ഞെടുപ്പിനുള്ള സിപിഎം സാധ്യത പട്ടികയ്ക്ക് പിന്നാലെ സിപിഐ സ്ഥാനാര്‍ത്ഥി നിര്‍ണയ ചര്‍ച്ചകള്‍ക്ക് തുടക്കമായി. സ്ഥാനാര്‍ത്ഥി നിര്‍ണയ ചര്‍ച്ചകള്‍ക്കായി സംസ്ഥാന എക്‌സിക്യൂട്ടീവ് യോഗം ഇന്ന് ചേരും. സിപിഐയ്ക്ക് സംസ്ഥാനത്ത് നാല് സീറ്റുകളാണ് ലഭിക്കുക. 26ന് ചേരുന്ന സംസ്ഥാന നേതൃയോഗങ്ങള്‍ പട്ടികയില്‍ അന്തിമ തീരുമാനമെടുക്കും.
തിരുവനന്തപുരം, മാവേലിക്കര, തൃശൂര്‍, വയനാട് എന്നീ സീറ്റുകളിലാണ് സിപിഐ മത്സരിക്കുന്നത്. തിരുവനന്തപുരത്ത് പന്ന്യന്‍ രവീന്ദ്രനും, മാവേലിക്കരയില്‍ എഐവൈഎഫ് നേതാവ് സിഎ അരുണ്‍കുമാറും തൃശൂരില്‍ വിഎസ് സുനില്‍ കുമാറും വയനാട്ടില്‍ ആനിരാജയും മത്സരിക്കാനാണ് സാധ്യത.
ജില്ല കമ്മിറ്റികളില്‍ നിന്ന് ഉയര്‍ന്നുവരുന്ന പേരുകള്‍ കൂടി കണക്കിലെടുത്താവും സംസ്ഥാന നേതൃത്വം പട്ടിക തയ്യാറാക്കുക. സ്ഥാനാര്‍ത്ഥി പട്ടിക ദേശീയ എക്‌സിക്യൂട്ടീവ് അനുമതിയ്ക്ക് ശേഷമായിരിക്കും പ്രഖ്യാപിക്കുക.