അഞ്ചരക്കണ്ടി ഡെന്റല് കോളേജ് വിദ്യാര്ത്ഥി നിതിന് രാജ് ആത്മഹത്യ ചെയ്ത സംഭവത്തില് ഒന്നാം പ്രതിയായ അധ്യാപകന് ഡോ എം കെ റാമിന് മുന്കൂര് ജാമ്യമില്ല. എന്നാല് രണ്ടാം പ്രതി സംഗീത നമ്പ്യാര്ക്ക് കോടതി മുന്കൂര് ജാമ്യം അനുവദിച്ചു. തലശ്ശേരി അഡിഷനല് സെഷന്സ് കോടതി നാലിന്റെതാണ് വിധി. നിതിന് മരണത്തിന്റെ 16ആം ദിനമാണ് ജാമ്യാപേക്ഷയില് വിധി വന്നിരിക്കുന്നത്.
ഡോ എം കെ റാം കോടതിയെ തെറ്റിദ്ധരിപ്പിക്കാന് ശ്രമിച്ചുവെന്നും ജാതി അധിക്ഷേപം എന്ന വാദം നിലനില്ക്കുമെന്നും രണ്ടാം പ്രതിയുടെ ജാമ്യത്തില് വിധി പരിശോധിച്ച ശേഷം പ്രതികരിക്കുമെന്നും പ്രോസിക്യൂഷന് പറഞ്ഞു. റാം ഒബിസി വിഭാഗക്കാരനാണ്. ജാതി അധിക്ഷേപം ഉണ്ടായിട്ടുണ്ട്. അപ്പീല് നല്കുന്നത് കുടുംബവുമായി ആലോചിച്ച ശേഷമെന്നും പ്രോസിക്യൂഷന് വ്യക്തമാക്കി.
ജാതി അധിക്ഷേപം എന്ന വകുപ്പ് ഒഴിവാക്കാന് ഡോക്ടര് റാം പട്ടികജാതിക്കാരനാണെന്ന രേഖ ഹാജരാക്കിയെന്നും അങ്ങനയല്ലെന്ന് കോടതിയെ ബോധ്യപ്പെടുത്തിയതായും പബ്ലിക് പ്രൊസിക്യൂട്ടര് പറഞ്ഞിരുന്നു. തലശ്ശേരി കോടതിയിലാണ് വിശദമായ വാദം പൂര്ത്തിയായത്. ഏറ്റവും പ്രധാനപ്പെട്ടത്, എസ്സി, എസ്റ്റി അട്രോസിറ്റി ആക്റ്റില് നിന്ന് രക്ഷപ്പെടാന് വേണ്ടി ഡോക്ടര് റാം താനൊരു എസ് സി വിഭാഗത്തില്പെട്ട ആളെന്ന് തെളിയിക്കുന്ന രേഖ ഹര്ജിയോടൊപ്പം കോടതിയില് ഹാജരാക്കിയിരുന്നു. എന്നാല് കര്ണായകയില്, റാം ജനിച്ചത് ഒബിസി വിഭാഗത്തിലാണ് എന്ന് കോടതിയെ ബോധ്യപ്പെടുത്തിയതായി പബ്ലിക് പ്രൊസിക്യൂട്ടര് പറഞ്ഞു.
വലിയ കുറ്റകൃത്യമാണ് നടന്നിരിക്കുന്നത്, അതിനാല് മുന്കൂര് ജാമ്യം നല്കരുതെന്നാണ് പബ്ലിക് പ്രൊസിക്യൂട്ടര് ആവശ്യപ്പെട്ടിരുന്നത്. നിതിന് രാജിന്റെ മരണത്തില് അധ്യാപകനെതിരെ ഗുരുതര ആരോപണങ്ങളുമായി മറ്റ് വിദ്യാര്ത്ഥികള് രംഗത്തെത്തിയിരുന്നു. ഡെന്റല് അനാട്ടമി വിഭാഗം മേധാവി എം കെ റാം മാനസികവും ശാരീരികവുമായി പീഡിപ്പിച്ചിരുന്നതായി വിദ്യാര്ഥികള് പൊലീസിന് മൊഴി നല്കിയിരുന്നു.
നിതിന്റെ മരണത്തില് പങ്കില്ലെന്നാണ് അധ്യാപകര് മുന്കൂര് ജാമ്യ ഹര്ജിയില് പറഞ്ഞിരിന്നത്. സംഭവത്തില് അധ്യാപകരായ എം കെ റാം, ഡോ സംഗീത എന്നിവരെ പ്രതികളാക്കി പൊലീസ് കേസെടുത്തിരുന്നു. ഇവര്ക്കെതിരെ ആത്മഹത്യാ പ്രേരണ കുറ്റമാണ് ചുമത്തിയിട്ടുള്ളത്. പട്ടികജാതി പട്ടികവര്ഗ്ഗ അതിക്രമ നിരോധന വകുപ്പും ഉള്പ്പെടുത്തിയിട്ടുണ്ട്. നിതിന് രാജിന്റെ ആത്മഹത്യയാണ് എന്നതില് സംശയം ഇല്ലെന്നാണ് പൊലീസ് വ്യക്തമാക്കിയത്.
കണ്ണൂര് ഡെന്റല് കോളേജിലെ വകുപ്പ് മേധാവി എം കെ റാം ക്ലാസ്സിനകത്തും പുറത്തും നിതിനെ നിരന്തരം വേട്ടയാടിയിരുന്നു. മാര്ക്ക് കുറച്ചും കുടുംബങ്ങളെ അധിക്ഷേപിച്ചും കളിയാക്കിയും പരാമര്ശങ്ങള് നടത്തിയെന്നും നിതിന് വെളിപ്പെടുത്തിയിരുന്നു. നിതിന് രാജിന്റെ സമാന അനുഭവമുള്ള മറ്റു വിദ്യാര്ത്ഥികള് ഇനിയുമുണ്ട് ഡെന്റല് കോളേജില്. തുറന്നുപറഞ്ഞാല് നടപടി നേരിടുമെന്നായിരുന്നു വിദ്യാര്ത്ഥികളുടെ ആശങ്ക. കഴിഞ്ഞവര്ഷം വിദ്യാര്ത്ഥികളുടെ പരാതിയില് ഡോക്ടര് എം കെ റാം സസ്പെന്ഷനിലായിരുന്നു. സംഭവത്തെ തുടര്ന്ന് കോളേജില് നിന്നും ഡോ എം കെ റാമിനെയും, ഡോ സംഗീത നമ്പ്യാരെയും പുറത്താക്കിയിരുന്നു.