യെമനില് കൊലപാതക കേസില് ജയിലില് കഴിയുന്ന നിമിഷപ്രിയയുടെ വധശിക്ഷ ഈ മാസം 16ന് നടപ്പാക്കാന് ഉത്തരവായി. യെമന് പൗരനെ കൊലപ്പെടുത്തിയ കേസിലാണ് നിമിഷപ്രിയ തടവില് കഴിയുന്നത്. യെമനിലെ പബ്ലിക്ക് പ്രോസിക്യൂട്ടര് ഉത്തരവ് ജയില് അധികൃതര്ക്ക് കൈമാറി. 2017ല് ആയിരുന്നു കേസിന് ആസ്പദമായ സംഭവം.
തലാല് അബ്ദു മഹ്ദിയെ കൊലപ്പെടുത്തിയ കേസിലാണ് നിമിഷ പ്രിയയ്ക്ക് വിചാരണ കോടതി വധശിക്ഷ വിധിച്ചത്. ഇന്ത്യന് എംബസിയും ഇക്കാര്യം സ്ഥിരീകരിച്ചെന്നാണ് പുറത്തുവരുന്ന വിവരം. തലാലിന്റെ കുടുംബത്തിന് ദയാധനം നല്കാന് ശ്രമിച്ചിരുന്നെങ്കിലും ഫലം കണ്ടില്ല. ഇതോടെയാണ് വധശിക്ഷ ഉറപ്പായത്.
നിമിഷ പ്രിയയെ രക്ഷിക്കാനുള്ള ഏക മാര്ഗം തലാലിന്റെ കുടുംബത്തിന് ദയാധനം നല്കുകയായിരുന്നു. എന്നാല് തലാലിന്റെ കുടുംബവുമായും ഗോത്രത്തിന്റെ തലവന്മാരുമായും ചര്ച്ചകള് നടത്തിയെങ്കിലും ഫലമുണ്ടായില്ലെന്നാണ് വിവരം. വധശിക്ഷ ഒഴിവാക്കാനുള്ല നിയമപരമായ വഴികളെല്ലാം അടഞ്ഞതായും സനായിലുള്ള തലാലിന്റെ കുടുംബം മാപ്പു നല്കുക മാത്രമാണ് നിമിഷപ്രിയയെ രക്ഷിക്കാനുള്ള ഒരേയൊരു വഴിയെന്നും മനുഷ്യാവകാശ പ്രവര്ത്തകന് സാമുവല് ജെറോം പറഞ്ഞു.