കാസര്കോട് നീലേശ്വരം വെടിക്കെട്ട് അപകടത്തില് ഒരാള് കൂടി മരിച്ചു. നീലേശ്വരം തേര്വയല് സ്വദേശി മകം വീട്ടില് പത്മനാഭന് ആണ് ചികിത്സയിലിരിക്കെ മരിച്ചത്. അപകടത്തില് പരിക്കേറ്റ് കണ്ണൂരിലെ സ്വകാര്യ ആശുപത്രിയില് ചികിത്സയിലായിരുന്നു പത്മനാഭന്. ഇതോടെ വെടിക്കെട്ട് അപകടത്തില് മരിച്ചവരുടെ എണ്ണം ആറായി.
അപകടത്തില് പരിക്കേറ്റ് ചികിത്സയിലായിരുന്ന കിണാവൂര് സ്വദേശി രജിത്, രതീഷ്, സന്ദീപ്, നീലേശ്വരം കൊല്ലം പാറ സ്വദേശി ബിജു, ചെറുവത്തൂര് സ്വദേശി ഷിബിന് രാജ് എന്നിവര് മരിച്ചിരുന്നു. അപകടത്തില് 50 ശതമാനത്തിലേറെ ബിജുവിന് പൊള്ളലേറ്റിരുന്നു. സന്ദീപിന് 90 ശതമാനമാണ് പൊള്ളലേറ്റത്. വെടിക്കെട്ടപകടത്തില് നൂറിലേറെ പേര്ക്കാണ് പരുക്കേറ്റത്.
കളിയാട്ടത്തിന്റെ ആദ്യദിനം രാത്രി 12 മണിക്കാണ് സംഭവം നടക്കുന്നത്. ചൈനീസ് പടക്കം പൊട്ടിക്കുന്നതിനിടെ കമ്പപ്പുരയ്ക്ക് മുകളിലേക്ക് തീപ്പൊരി വന്ന് പതിക്കുകയായിരുന്നു. പടക്കശേഖരം സൂക്ഷിച്ചിരുന്ന കമ്പപ്പുരയും വെടിക്കെട്ട് സ്ഥലവും തമ്മിലുള്ള ദൂരം വെറും മൂന്നരയടി മാത്രം. നൂറ് മീറ്റര് അകലം വേണമെന്ന ചട്ടങ്ങള് കാറ്റില്പ്പറത്തിയായിരുന്നു വെടിക്കെട്ട്. മൂവാളംകുഴി ചാമുണ്ഡി തെയ്യത്തിന്റെ കുളിച്ചുതോറ്റ ചടങ്ങ് പുരോഗമിക്കുന്നതിനിടെയാണ് അപകടം. അഞ്ഞൂറ്റമ്പലം വീരര്കാവ് ക്ഷേത്രക്കമ്മിറ്റി പ്രസിഡന്റ് ചന്ദ്രശേഖരന്, സെക്രട്ടറി ഭരതന്, പടക്കത്തിന് തിരികൊളുത്തിയ രാജേഷ് എന്നിവര്ക്കാണ് ഹോസ്ദുര്ഗ് സി ജെ എം കോടതി ജാമ്യം അനുവദിച്ചിരുന്നു.