പുതിയ കേരള കോണ്ഗ്രസ് പാര്ട്ടി രൂപീകരിച്ച് സജി മഞ്ഞക്കടമ്പിൽ. കോട്ടയത്ത് സജിയുടെ നേതൃത്വത്തില് ചേര്ന്ന യോഗത്തിന് ശേഷമാണ് പാർട്ടി രൂപീകരണത്തിൽ നിലപാട് വ്യക്തമാക്കിയത്. പുതിയ പാർട്ടിയുടെ പേര് കേരള കോൺഗ്രസ് ഡെമോക്രാറ്റിക് എന്നായിരിക്കുമെന്ന് സജി പ്രഖ്യാപിച്ചു. ഇക്കഴിഞ്ഞ ദിവസമാണ് സജി മഞ്ഞക്കടമ്പിൽ കോട്ടയം ജില്ല യുഡിഎഫ് ചെയര്മാന് സ്ഥാനം രാജിവെച്ചത്.
കെ.എം മാണിയുടെയും സി.എഫ് തോമസിന്റെയും യഥാർഥ പിൻഗാമികൾ തങ്ങളാണെന്നും സജി മഞ്ഞക്കടമ്പിൽ പറഞ്ഞു. സുസ്ഥിര കേന്ദ്രം സമൃദ്ധ കേരളം എന്ന മാണി സാറിന്റെ നയം ഞങ്ങൾ പിന്തുടരും. അതേസമയം കോട്ടയത്തെ എന്ഡിഎ സ്ഥാനാര്ത്ഥി തുഷാർ വെള്ളാപ്പള്ളിക്ക് പാർട്ടി പിന്തുണ അറിയിച്ചു. ബിജെപിയുടെ മുഴുവൻ ആശയങ്ങളോടും യോജിപ്പില്ലാത്ത കൊണ്ടാണ് ബിജെപിയിൽ ചേരാത്തതെന്നും റബർ കർഷകർക്കു വേണ്ടിയാണ് എൻഡിഎ സ്ഥാനാർഥിക്ക് പിന്തുണ നൽകുന്നതെന്നും സജി മഞ്ഞക്കടമ്പിൽ വ്യക്തമാക്കി.
അതേസമയം സജി മഞ്ഞക്കടമ്പിലിന് പിന്തുണ അറിയിച്ച് തുഷാർ വെള്ളാപ്പള്ളിയും പ്രഖ്യാപന ചടങ്ങിനെത്തി. ഇന്നത്തെ യഥാർഥ കേരള കോൺഗ്രസാണ് ഇവിടെ ഇരിക്കുന്നതെന്നും സജി എടുത്ത നിലപാടിൽ അഭിമാനമണ്ടെന്നും തുഷാർ വെള്ളാപ്പള്ളി പറഞ്ഞു. റബർ പ്രശ്നം അവസാനിപ്പിച്ചു കൊടുക്കാൻ നമ്മൾ ഒറ്റക്കെട്ടായി നിന്നാൽ സാധിക്കുമെന്നും തുഷാര് വെള്ളാപ്പള്ളി കൂട്ടിച്ചേർത്തു.
കേരള കോണ്ഗ്രസ് ഡെമോക്രാറ്റിക് പാർട്ടിയുടെ ഭാരവാഹികളെയും തിരഞ്ഞെടുത്തു. പാർട്ടിയുടെ ചെയർമാൻ സജി മഞ്ഞക്കടമ്പിൽ, വർക്കിംഗ് ചെയർമാൻ ദിനേശ് കർത്ത, വൈസ് ചെയർമാൻ ബാലു ജി വെള്ളിക്കര, ജനറൽ സെക്രട്ടറി പ്രസാദ് ഉരുളികുന്നം, യൂത്ത് ഫ്രണ്ട് ചെയർമാൻ: ജിജോ കൂട്ടുമ്മേക്കാട്ടിൽ എന്നിവരാണ് ഭാരവാഹികൾ.