ദേശീയപാതാ പ്രവൃത്തികള് വേഗത്തില് പൂര്ത്തീകരിക്കണമെന്ന് നിർദേശം നൽകി മുഖ്യമന്ത്രി പിണറായി വിജയൻ. ദേശീയപാതയുമായി ബന്ധപ്പെട്ട് ചേര്ന്ന റിവ്യൂ യോഗത്തിലാണ് മുഖ്യമന്ത്രിയുടെ നിർദേശം. സാങ്കേതിക കാര്യങ്ങളില് വിട്ടുവീഴ്ചയില്ലാതെ ദേശീയപാതാ പ്രവൃത്തികള് വേഗത്തില് പൂര്ത്തീകരിക്കണമെന്ന് മുഖ്യമന്ത്രി പറഞ്ഞു. അതേസമയം ദേശീയപാതാ അതോറിറ്റി പൊതുവില് നല്ല പ്രവര്ത്തനമാണ് കാഴ്ചവെക്കുന്നതെങ്കിലും ചില മേഖലകളില് സ്തംഭനമുണ്ടെന്നും മുഖ്യമന്ത്രി ചൂണ്ടിക്കാട്ടി.
വടകര, തുറവൂര്, തിരുവനന്തപുരം ഉള്പ്പെടെ ചില സ്ഥലങ്ങളിലെങ്കിലും പ്രവൃത്തി മന്ദഗതിയിലാണെന്നും മെല്ലെപ്പോക്ക് നടത്തുന്ന കരാറുകാര്ക്കെതിരെ കര്ശന നടപടിയിലേക്ക് നീങ്ങണമെന്നും മുഖ്യമന്ത്രി ദേശീയപാത അധികൃതരോട് ആവശ്യപ്പെട്ടു. കണ്ണൂര് ജില്ലയിലെ നടാലില് ബസുകള്ക്ക്കുടി സഞ്ചരിക്കുന്ന വിധത്തില് അടിപ്പാത നിര്മ്മിക്കേണ്ടതുണ്ട്. അവിടെ ബസ് ഉടമകള് മാത്രമല്ല നാട്ടുകാരും പ്രതിഷേധത്തിലാണ്. ചാല വരെ സഞ്ചരിച്ച് ബസ് തിരിച്ചുവരേണ്ടി വരുന്ന അവസ്ഥയാണ്. ഇത് പ്രത്യേക കേസായി പരിഗണിച്ച് നടപടി സ്വീകരിക്കണമെന്നും മുഖ്യമന്ത്രി പറഞ്ഞു.
നിര്മ്മാണ പ്രവൃത്തിക്ക് തടസമുണ്ടാകരുത്. ഇത്തരം പ്രശ്നങ്ങള് ചര്ച്ച ചെയ്ത് പരിഹരിക്കാന് ബന്ധപ്പെട്ട ജില്ലാകളക്ടറും പോലീസ് മേധാവിയും മുന്കൈയെടുക്കണം. കേരളത്തിന്റെ ഭൂമി ശാസ്ത്രവും ജനസാന്ദ്രതയും കണക്കിലെടുത്തു വേണം പ്രവൃത്തികള് നടത്താനെന്നും മുഖ്യമന്ത്രി പറഞ്ഞു. ആര്ബിട്രേഷന് സമയബന്ധിതമായി തീര്ക്കാനുള്ള നടപടികള് സ്വീകരിക്കണമെന്നും മുഖ്യമന്ത്രി പറഞ്ഞു.