മുട്ടില് മരംമുറി കേസില് പ്രതികള്ക്ക് തിരിച്ചടി. തടികൾ കണ്ടുകെട്ടിയതിനെതിരെ സമർപ്പിച്ച അപ്പീൽ തള്ളി. ഈട്ടിത്തടികള് കണ്ടുകെട്ടിയ നടപടി വയനാട് ജില്ലാ കോടതി ശരിവച്ചു. 2021ലെ ഈട്ടിക്കൊള്ളയുമായി ബന്ധപ്പെട്ടാണ് വയനാട് ജില്ലാ കോടതിയില് നിന്നും സുപ്രധാന തീരുമാനം വന്നിരിക്കുന്നത്. ഉപാധികളോടെ പട്ടയമുള്ള ഭൂമിയില് നിന്നും മുറിച്ചെടുത്ത മരങ്ങള് വനംവകുപ്പ് പിടികൂടിയിരുന്നു. ഈ മരങ്ങള് കണ്ടുകെട്ടിയതിനെ തുടര്ന്ന് ഈ നടപടി റദ്ദാക്കണമെന്ന് ആവശ്യപ്പെട്ട് പ്രതികള് കോടതിയെ സമീപിച്ചിരുന്നു. ഈ അപ്പീലാണ് ഇപ്പോള് വയനാട് ജില്ലാ കോടതി തള്ളിയിരിക്കുന്നത്. സര്ക്കാരിലേക്ക് വന്ന് ചേരേണ്ട മരങ്ങളാണിതെന്നും അപ്പീല് നിലനില്ക്കില്ലെന്നുമാണ് കോടതി നിരീക്ഷിച്ചിരിക്കുന്നത്.