പാലാ ബിഷപ്പിന്റെ വിദ്വേഷ പ്രസംഗത്തിന്റെ പശ്ചാത്തലത്തിൽ മാർ ക്ലീമിസ് വിളിച്ച മതനേതാക്കന്മാരുടെ യോഗത്തിൽ മുസ്ലിം സംഘടനകള് പങ്കെടുക്കില്ല. സമസ്ത കേരള ജംഇയ്യത്തുല് ഉലമ, സമസ്ത എ.പി വിഭാഗം, ദക്ഷിണ കേരള ജംഇയ്യത്തുല് ഉലമ, ജമാഅത്തെ ഇസ്ലാമി എന്നീ സംഘടനകൾ പങ്കെടുക്കുന്നില്ലെന്ന് അറിയിച്ചതായി മീഡിയ വൺ റിപ്പോർട്ട് ചെയ്തു.
വിവാദ പരാമര്ശം നടത്തിയ പാലാ ബിഷപ്പ് ജോസഫ് കല്ലറങ്ങാട്ട് മാപ്പ് പറയണമെന്ന നിലപാടിലാണ് മുസ്ലിം സംഘടനകള്. അല്ലെങ്കില് വിദ്വേഷ പരാമര്ശം ബിഷപ്പ് പിന്വലിക്കണം. അല്ലാതെ മദ്ധ്യസ്ഥ ചര്ച്ചയുടെ ആവശ്യമില്ലെന്ന നിലപാടിലാണ് മുസ്ലിം സംഘടനകള്.
തിരുവനന്തപുരത്ത് ക്ലിമ്മീസ് ബാവയുടെ അദ്ധ്യക്ഷതയിൽ വൈകിട്ട് മൂന്നരയ്ക്കാണ് യോഗം ആരംഭിച്ചത്. പ്രമുഖ മുസ്ലിം സംഘടനകള് യോഗത്തില് നിന്ന് വിട്ടുനില്ക്കുന്നുണ്ടെങ്കിലും യൂത്ത്ലീഗ് സംസ്ഥാന അദ്ധ്യക്ഷന് പാണക്കാട് സയ്യിദ് മുനവ്വറലി ശിഹാബ് തങ്ങള്, കെഎന്എം നേതാവ് ഹുസൈന് മടവൂര്, അധ്യാപകന് അഷ്റഫ് കടയ്ക്കല് എന്നിവര് യോഗത്തില് പങ്കെടുക്കുന്നുണ്ട്. ഗുരുരത്നം ജ്ഞാനതപസ്വി അടക്കമുള്ളവരും യോഗത്തിനെത്തിയിട്ടുണ്ട്. വിവിധ സഭാ അദ്ധ്യക്ഷന്മാരും യോഗത്തില് പങ്കെടുക്കും.
പാലാ ബിഷപ്പ് നടത്തിയ വിദ്വേഷ പ്രസംഗവും അതിനെ പ്രോത്സാഹിപ്പിക്കുന്ന തരത്തിൽ ഉള്ള സർക്കാർ നിലപാടും മുസ്ലിം സമൂഹത്തില് വലിയ പ്രതിഷേധമാണ് ഉയർത്തുന്നത്. പാലാ ബിഷപ്പ് ഹൗസ് സന്ദർശിച്ച് വിവാദം അടഞ്ഞ അദ്ധ്യായമാണെന്ന് മന്ത്രി വി എന് വാസവന് പറഞ്ഞതും മുസ്ലിം സംഘടനകളെ നിരാശപ്പെടുത്തിയിട്ടുണ്ട്.