സിനിമ നിര്‍മാണ മേഖലയിലെ സാങ്കേതിക സൗകര്യങ്ങള്‍ മെച്ചപ്പെടുത്തി മലയാള സിനിമയെ ലോക നിലവാരത്തിലേക്കുയര്‍ത്തണമെന്ന് സാംസ്‌കാരിക വകുപ്പ് മന്ത്രി സജി ചെറിയാന്‍. ലഭ്യമായ ആധുനിക സൗകര്യങ്ങളും അനുകൂല അന്തരീക്ഷവുമൊരുക്കി ചിത്രാഞ്ജലി സ്റ്റുഡിയോ മികച്ച ഷൂട്ടിംഗ് കേന്ദ്രമാക്കി മാറ്റുമെന്നും അദ്ദേഹം കൂട്ടിച്ചേര്‍ത്തു. സംസ്ഥാന ചലച്ചിത്ര വികസന കോര്‍പ്പറേഷന്‍ സംഘടിപ്പിച്ച സിനി എക്‌സ്‌പോയില്‍ സംസാരിക്കുകയായിരുന്നു മന്ത്രി.
കേരളത്തിന്റെ പ്രകൃതി ഭംഗി മലയാള സിനിമയ്ക്ക് പുറത്തേക്കും വ്യാപിപ്പിക്കുന്നതിന് പ്രത്യേക ക്യാമ്പയിന്‍ നടത്തുമെന്ന് മന്ത്രി പറഞ്ഞു. മറ്റ് ഭാഷാസിനിമകളിലും കേരളത്തിലെ സ്ഥലങ്ങള്‍ പ്രതിഫലിക്കണം. ആധുനിക രീതിയിലുള്ള കൂടുതല്‍ തിയേറ്ററുകള്‍ നിര്‍മിക്കുന്നതിനുള്ള നടപടി കാര്യക്ഷമമാക്കും. സര്‍ക്കാര്‍ നിയന്ത്രണത്തിലുള്ള ഒടിടി പ്ലാറ്റ്‌ഫോം നിര്‍മാണം അന്തിമഘട്ടത്തിലാണെന്ന് മന്ത്രി പറഞ്ഞു.
തിരുവനന്തപുരം സത്യന്‍ സ്മൃതി ഹാളില്‍ നടന്ന സിനി എക്‌സ്‌പോ കെ. എസ് എഫ് ഡി സി ചെയര്‍മാന്‍ ഷാജി എന്‍ കരുണ്‍ ഉദ്ഘാടനം ചെയ്തു. സിനിമാ നിര്‍മാണവുമായി ബന്ധപ്പെട്ട സാങ്കേതിക സംവിധാനങ്ങള്‍ പ്രദര്‍ശിപ്പിക്കുന്നതിന് ഓഡിയോ വിഷ്വല്‍ മേഖലയിലെ പ്രശസ്ത സിനിമാ നിര്‍മാണ ഉപകരണ കമ്പനികളായ ആരി, സോണി, സിഗ്മ, സീസ്, അപ്പുച്ചര്‍, ഡിസ്‌ഗൈസ് തുടങ്ങിയ 13 കമ്പനികള്‍ എക്‌സ്‌പോയില്‍ പങ്കെടുത്തു. ചിത്രാഞ്ജലി സ്റ്റുഡിയോയിലേക്ക് മികച്ച ഉപകരണങ്ങള്‍ വാങ്ങുന്നതിന്റെ ഭാഗമായാണ് എക്‌സ്‌പോ സംഘടിപ്പിച്ചത്.