ഗള്ഫില് മാധ്യമം ദിനപത്രം നിരോധിക്കാന് ഇടപെട്ടുവെന്ന ആരോപണത്തില് മുന് മന്ത്രിയും എംഎല്എയുമായ കെ ടി ജലീലിനെതിരെ ‘മാധ്യമം’. ‘വന്ദേഭാരത് മിഷന് വഴി കൊവിഡ്-19 രോഗികളെ നാട്ടിലെത്തിക്കാന് വഴിയുണ്ടായിട്ടും മുട്ടാപ്പോക്ക് ന്യായങ്ങളിലൂടെ കേന്ദ്ര-സംസ്ഥാന സര്ക്കാറുകള് അതിനെല്ലാം തടയിട്ടപ്പോഴാണ് അത്തരമൊരു ആവിഷ്കാരത്തിന് നിര്ബന്ധിതരായത്.’ എന്ന് മാധ്യമം വിശദീകരിക്കുന്നു. മാധ്യമത്തിനെതിരെ മുന് മന്ത്രിയുടെ കുത്തിത്തിരിപ്പ് എന്ന തലക്കെട്ടോടെയാണ് പത്രത്തില് നിലപാട് വ്യക്തമാക്കിയത്.
സ്വര്ണക്കടത്ത് കേസ് പ്രതി സ്വപ്നാ സുരേഷ് ഹൈക്കോടതിയില് സമര്പ്പിച്ച സത്യവാങ്മൂലത്തിലാണ് കെ ടി ജലീല് മാധ്യമം ദിനപത്രം നിരോധിക്കാന് ഇടപെട്ടുവെന്ന ആരോപണമുള്ളത്. എന്നാല് മാധ്യമം പ്രസിദ്ധീകരിച്ച ഒരു വാര്ത്തയുടെ നിജസ്ഥിതി അറിയാന് താന് കോണ്സുല് ജനറലിന്റെ പിഎയ്ക്ക് വാട്സ്ആപ്പ് സന്ദേശം അയച്ചിരുന്നുവെന്നാണ് ഇതില് ജലീലിന്റെ മറുപടി.
അതല്ലാതെ യുഎഇ ഭരണാധികാരിക്ക് ഒരു കാലത്തും ഒരു കാര്യത്തിനും കത്തോ മെയിലോ അയച്ചിട്ടില്ലെന്നും ഇതിനായി തന്റെ അക്കൗണ്ട് പരിശോധിക്കാമെന്നും ജലീല് പറഞ്ഞിരുന്നു. മാധ്യമം പ്രസിദ്ധീകരിച്ച ഫീച്ചറിനെ മുഖ്യമന്ത്രി കുത്തിത്തിരിപ്പ് എന്നായിരുന്നു വിമര്ശിച്ചത്. അതേവാക്കിലൂടെ തന്നെയാണ് മാധ്യമം ജലീലിനെതിരെ പ്രതികരിച്ചത്.
മന്ത്രിയായിരിക്കെ പ്രോട്ടോകോള് മര്യാദപോലും ജലീല് പാലിച്ചില്ലെന്നും മാധ്യമം ചൂണ്ടികാട്ടി. അധികാര ദുര്വിനിയോഗം സര്ക്കാറിന്റെ അറിവോ അനുവാദമോ ഇല്ലാതെയാണെന്ന ജലീലിന്റെ വാദം അപ്രസക്തമാണെന്നും മാധ്യമം കൂട്ടിച്ചേര്ത്തു.