ഫുട്ബോൾ കളിക്കുമ്പോൾ അയൽപക്കത്തെ വീട്ടിലേക്ക് തെറിച്ചു വീണ പന്ത് നശിപ്പിച്ച വീട്ടമ്മയ്ക്കെതിരെ രോഷാകുലനാവുന്ന കുട്ടിപ്പന്തുകളിക്കാരൻറെ വിഡിയോ സമൂഹ മാധ്യമങ്ങളിൽ വെെറലായിരിക്കുകയാണ്. എന്തിനാ ചേച്ചി ആ പന്ത് കുത്തിപ്പൊട്ടിച്ച് കളഞ്ഞേ എന്ന് കുട്ടിപ്പന്തുകളിക്കാരൻ ഫെയ്സ് ബുക്ക് ലെെവിലൂടെ ചോദിക്കുന്നുണ്ട്.
ലൈവിൽ കുട്ടി പറയുന്നതിങ്ങനെയാണ്,
“ദേ 1750 രൂപയാ ഈ പന്തിന്. എന്തിനാ ആ ചേച്ചി കുത്തിപ്പൊട്ടിച്ച് കളഞ്ഞേ.. അതും മീൻ വെട്ടുന്ന പിച്ചാത്തി കൊണ്ട്. മാന്യമായിട്ട് പറഞ്ഞാൽ പോരെ ഇനി ഇങ്ങോട്ട് പന്ത് അടിക്കരുതെന്ന്. നിങ്ങൾ ഇതു കണ്ടോ.. ഈ പന്ത് കണ്ടോ നിങ്ങൾ.. എന്തൊരു സ്വഭാവമാണ് ചേച്ചീ.” വീഡിയോയിൽ രോഷത്തോടെ ഈ പയ്യൻ ചോദിക്കുന്നു. കളിക്കുന്നതിനിടെ അയൽപക്കത്തെ വീട്ടിലേക്ക് പന്തു വീണതിനാണ് ചേച്ചി പന്ത് കത്തി കൊണ്ട് കുത്തിപ്പൊട്ടിച്ച് തിരിച്ചുകൊടുത്തത്. നിരാശരായ കുട്ടികൾ രോഷം ഫേസ്‌ബുക്ക് ലൈവിലൂടെ പങ്കുവച്ചു. ഇതോടെ സംഭവം വൈറലായി. ഒട്ടേറെ പേരാണ് ഫോൺ നമ്പർ കൊടുത്ത ശേഷം, വിളിക്കെടാ മക്കളെ.. പന്തു ഞാൻ വാങ്ങിത്തരാം.. എന്നു കുറിക്കുന്നത്.
ഫെയ്സ് ബുക്ക് ലൈവ് വൈറലായതോടെ കുട്ടികളുടെ വിഷമം മനസ്സിലാക്കി പലരും സഹായഹസ്തവുമായി മുന്നോട്ട് വന്നു തുടങ്ങി. പന്ത് കുത്തിക്കീറിയ സ്ത്രീക്കെതിരെ വലിയ പ്രതിഷേധവും ഉണ്ടായി. സാധാരണക്കാരായ കുട്ടികൾക്ക് സോഷ്യൽ മീഡിയയിലൂടെ സഹായം വാഗ്ദാനം ചെയ്യുന്നുണ്ടെങ്കിലും ഇവരെ ബന്ധപ്പെടാൻ കഴിയാത്തത് പലർക്കും തടസമായി നിൽക്കുകയാണ്. കുട്ടികളെ ബന്ധപ്പെടാൻ 79027 60368 എന്ന നമ്പരിൽ ബന്ധപ്പെടാവുന്നതാണ്.