കൊടകര കുഴല്‍പ്പണക്കേസുമായി ബന്ധപ്പെട്ട പോലീസിന്‍റെ ചോദ്യംചെയ്യലിന് ഇന്ന് ഹാജരാകില്ലെന്ന് ബിജെപി സംസ്ഥാന പ്രസിഡന്‍റ് കെ. സുരേന്ദ്രൻ. കണ്ണൂരിൽ മാധ്യമങ്ങളോടു സംസാരിക്കുകയായിരുന്നു അദ്ദേഹം.
ചൊവ്വാഴ്ച എത്താന്‍ സാധിക്കില്ലെന്നും എന്ന് ഹാജരാവണമെന്ന് തീരുമാനിച്ചിട്ടില്ലെന്നും സുരേന്ദ്രന്‍ പറഞ്ഞു. എന്നാൽ ചൊവ്വാഴ്ച ഹാജരാവാത്തത് സംബന്ധിച്ച് ഇതുവരെയും അന്വേഷണ സംഘത്തെ അറിയിച്ചിട്ടില്ല.
ചൊവ്വാഴ്ച രാവിലെ 10ന് തൃശൂർ പൊലീസ് ക്ലബിൽ ഹാജരാകണമെന്ന് ആവശ്യപ്പെട്ട് അന്വേഷണ സംഘം സുരേന്ദ്രൻെറ വീട്ടിലെത്തി നോട്ടീസ് നല്‍കിയിരുന്നു. എന്നാൽ, കാസര്‍ഗോഡ് ബി.ജെ.പി സംസ്ഥാന നേതൃയോഗം ചേരുന്ന സാഹചര്യത്തില്‍ ഹാജരാകാന്‍ സാധിക്കില്ലെന്ന് നേരത്തേ സുരേന്ദ്രന്‍ പറഞ്ഞിരുന്നു.
അന്വേഷണവുമായി സഹകരിക്കുമെന്നായിരുന്നു ആദ്യം സുരേന്ദ്രൻ അടക്കമുള്ള ബി.ജെ.പി നേതാക്കളുടെ വാദം.