ഇന്ത്യയില്‍ ദാരിദ്രം ഏറ്റവും കുറഞ്ഞ സംസ്ഥാനം കേരളമെന്ന് റിപ്പോർട്ട്. നീതി ആയോഗ് പുറത്തിറക്കിയ ദാരിദ്ര്യ സൂചിക പ്രകാരം കേരളത്തിലെ 0.71 ശതമാനമാണ് കേരളത്തിലെ ദാരിദ്ര്യ നിരക്ക്. ജനസംഖ്യയുടെ 51.91 ശതമാനം പേരും ദാരിദ്രം അനുഭവിക്കുന്ന ബിഹാറാണ് പട്ടികയിൽ മുന്നിൽ. ബിഹാറിന് പുറമെ ജാര്‍ഖണ്ഡ്, ഉത്തര്‍പ്രദേശ്, മധ്യപ്രദേശ് എന്നീ സംസ്ഥാനങ്ങളും ദാരിദ്ര്യം കൂടുതലുള്ള പ്രദേശങ്ങളാണ്. ജാര്‍ഖണ്ഡില്‍ 42.16 ശതമാനവും ഉത്തര്‍പ്രദേശില്‍ 37.79 ശതമാനവും മധ്യപ്രദേശ് 36.65 ശതമാനവുമാണ് ദാരിദ്ര്യ നിരക്ക്. ഈ സംസ്ഥാനങ്ങള്‍ക്ക് തൊട്ടു പിന്നിലായി മേഘാലയയും ഉണ്ട്. 32.67 ശതമാനമാണ് മേഘാലയയിലെ ദാരിദ്ര്യ നിരക്ക്.
ഗോവ, സിക്കിം, തമിഴ്നാട്,പഞ്ചാബ് എന്നിവ ദാരിദ്ര്യ നിരക്ക് കുറഞ്ഞ സംസ്ഥാനങ്ങളാണ്. ഗോവയില്‍ 3.76 ശതമാനവും സിക്കിമില്‍ 3.82 ശതമാനവും തമിഴ്നാട്ടില്‍ 4.89 ശതമാനവും പഞ്ചാബില്‍ 5.59 ശതമാനവും ആണ് ദാരിദ്ര്യനിരക്ക്. ദാദ്ര ആന്‍ഡ് നാഗര്‍ ഹവേലി (27.36%), ജമ്മു ആന്‍ഡ് കശ്മീര്‍, ലഡാക്ക് (12.58%), ദാമന്‍ ആന്‍ഡ് ദിയു (6.82%), ചണ്ഡീഗഡ് (5.97%) എന്നിവയാണ ദാരിദ്ര്യം ഏറ്റവും കൂടുതുള്ള കേന്ദ്രഭരണ പ്രദേശങ്ങള്‍. ജനസംഖ്യയുടെ 1.72 ശതമാനം മാത്രം ദരിദ്രരായി അടയാളപ്പെടുത്തിയ പുതുച്ചേരി, ലക്ഷദ്വീപ് (1.82%), ആന്‍ഡമാന്‍ & നിക്കോബാര്‍ ദ്വീപുകള്‍ (4.30%), ഡല്‍ഹി (4.79%) എന്നിവയാണ ദാരിദ്ര്യം കുറഞ്ഞ കേന്ദ്ര ഭരണപ്രദേശങ്ങള്‍.
ആരോഗ്യം, വിദ്യാഭ്യാസം, ജീവിതനിലവാരം എന്നിവ ആധാരമാക്കിയാണ് ദാരിദ്ര്യ സൂചിക തയാറാക്കുന്നത്. പോഷകാഹാരം, ശിശുമരണം, കൗമാരക്കാരുടെ മരണം, സ്‌കൂള്‍ വിദ്യാഭ്യാസം, ഗര്‍ഭസ്ഥ ശിശുപരിചരണം, പാചക ഇന്ധനം, മാലിന്യ നിര്‍മാര്‍ജനം, കുടിവെള്ളം, വൈദ്യുതി, ഭവനം, സ്വത്ത്, ബാങ്ക് അക്കൗണ്ട് എന്നീ കാര്യങ്ങളും പരിശോധിച്ച് വിലയിരുത്തിയതിന് ശേഷമാണ് റിപ്പോര്‍ട്ട തയാറാക്കുക. ഓക്സ്ഫഡ് പോവര്‍ട്ടി ആന്‍ഡ് ഹ്യൂമന്‍ ഡെവലപ്മെന്റ് ഇനീഷ്യേറ്റീവും യുനൈറ്റഡ് നേഷന്‍സ് ഡെവലപ്മെന്റ് പ്രോഗ്രാമിന്റെയും രീതിശാസ്ത്രപ്രകാരമാണ് നിതി ആയോഗ് സംസ്ഥാനങ്ങളിലെ ദാരിദ്ര്യ സൂചിക നിര്‍മ്മിക്കുന്നത്.