കോട്ടയം ജില്ലയിലടക്കം പാർട്ടി മത്സരിച്ച സീറ്റുകളിലെ പ്രചാരണത്തിൽ സിപിഐ നിസഹകരിച്ചതായി കേരള കോൺഗ്രസ്. പാർട്ടിയുടെ സ്റ്റിയറിംഗ് കമ്മിറ്റി യോഗത്തിലാണ് വിമർശനം. അതേസമയം ആരോപണം അടിസ്ഥാന രഹിതമാണെന്ന് സിപിഐ നേതാക്കൾ പ്രതികരിച്ചു
സീറ്റ് വിഭജനം മുതൽ ഉടലെടുത്ത കേരള കോൺഗ്രസ് എം – സിപിഐ ഭിന്നതയാണ് തിരഞ്ഞെടുപ്പ് ഫലം വരാൻ ദിവസങ്ങൾ ബാക്കി നിൽക്കെ വീണ്ടും പുറത്തു വന്നിരിക്കുന്നത്. ജോസ് കെ മാണി മത്സരിച്ച പാലാ, റാന്നി, ഇരിക്കൂർ, കാഞ്ഞിരപ്പള്ളി എന്നിവിടങ്ങളിൽ സിപിഐ നിശബ്ദമായിരുന്നുവെന്നാണ് കേരളാ കോൺഗ്രസിൻറെ ആക്ഷേപം. സ്റ്റിയറിംഗ് കമ്മിറ്റിയിൽ യോഗത്തിൽ പാർട്ടി സ്ഥാനാർത്ഥികൾ ഇക്കാര്യം ചെയർമാൻ ജോസ് കെ മാണിയെ അറിയിച്ചു.
ഇരിക്കൂറിൽ പലയിടത്തും പ്രചാരണത്തിന് സിപിഐ പ്രാദേശിക നേതാക്കളുടെ സഹകരണമുണ്ടായിരുന്നില്ല. റാന്നിയിലെ സ്ഥാനാർത്ഥി പ്രമോദ് നാരായണനും സമാനമായ ആരോപണം ഉന്നയിച്ചു.