കേരള ബാങ്കിനെതിരെ കടുത്ത നടപടിയുമായി റിസര്വ് ബാങ്ക്. കേരള ബാങ്കിനെ സി ക്ലാസിലേക്ക് തരംതാഴ്ത്തിക്കൊണ്ടാണ് റിസര്വ് ബാങ്കിന്റെ പുതിയ നടപടി. നബാര്ഡ് റിസര്വ് ബാങ്കിന് നല്കിയ റിപ്പോര്ട്ടിന്റെ അടിസ്ഥാനത്തിലാണ് നടപടി. കേരള ബാങ്കിന്റെ റാങ്കിംഗ് മാനദണ്ഡങ്ങള് വിലയിരുത്താന് റിസര്വ് ബാങ്ക് നിയോഗിച്ച കണ്ട്രോളിംഗ് അതോറിറ്റി നബാര്ഡ് ആണ്.
നബാര്ഡിന്റെ റിപ്പോര്ട്ടിന്റെ അടിസ്ഥാനത്തില് 25 ലക്ഷത്തിന് മുകളില് വ്യക്തിഗത വായ്പ നല്കാന് കേരള ബാങ്കിന് റിസര്വ് ബാങ്ക് വിലക്കേര്പ്പെടുത്തിയിട്ടുണ്ട്. 25 ലക്ഷത്തിന് മുകളില് നല്കിയിട്ടുള്ള വായ്പകള് ഘട്ടം ഘട്ടമായി തിരിച്ചുപിടിക്കാനാണ് നിര്ദ്ദേശം. ഇതേ തുടര്ന്ന് കേരള ബാങ്ക് ഇതുസംബന്ധിച്ച് എല്ലാ ശാഖകളിലേക്കും കത്തയച്ചിട്ടുണ്ട്.
കേരള ബാങ്ക് നിലവില് സി ക്ലാസ് പട്ടികയിലാണെന്നും, ഈ സാഹചര്യത്തില് 25 ലക്ഷത്തിലധികം വ്യക്തിഗത വായ്പ അനുവദിക്കരുതെന്നും കത്തില് സൂചിപ്പിക്കുന്നു. കൂടാതെ നേരത്തെ 25 ലക്ഷത്തിലധികം അനുവദിച്ച വായ്പകളെല്ലാം ഘട്ടം ഘട്ടമായി കുറയ്ക്കണമെന്നും കത്തില് പറയുന്നുണ്ട്.
കേരള ബാങ്കിന്റെ മൂലധന പര്യാപ്തതയും നിഷ്ക്രിയ ആസ്തിയും വരുമാനവും ആസ്തി ബാധ്യതകളും വിശദമായി പരിഗണിച്ചും മാര്ക്ക് നല്കിയുമാണ് റാങ്കിംഗ് ശിപാര്ശ നബാര്ഡ് തയ്യാറാക്കിയത്. ഭരണസമിതിയില് രാഷ്ട്രീയ നോമിനികളെ കൂടാതെ ആവശ്യത്തിന് പ്രൊഫഷണലുകള് ഇല്ലാത്തതും കേരള ബാങ്കിന് കനത്ത തിരിച്ചടിയായി.