രാജ്യത്ത് ആകെ നടന്ന പിഎസ്സി നിയമനങ്ങളുടെ 40 ശതമാനവും കേരളത്തില്. കഴിഞ്ഞ വര്ഷം 25 സംസ്ഥാനങ്ങളില് പിഎസ്സി വഴി നടന്നത് 51498 നിയമനങ്ങള്. മൂന്നരക്കോടിമാത്രം ജനസംഖ്യയുള്ള കേരളത്തില് ഈ കാലയളവില് 34110 നിയമനം നടന്നതായി യൂണിയന് പബ്ലിക് സര്വീസ് കമീഷന് (യുപിഎസ്സി) പുറത്തുവിട്ട റിപ്പോര്ട്ടില് പറയുന്നുവെന്ന് സിപിഎം സമൂഹമാധ്യമ അക്കൗണ്ട് വ്യക്തമാക്കുന്നു.
കേരളത്തില് പിഎസ്സി നിയമനം റെക്കോഡ് വേഗത്തില് കുതിക്കുമ്പോള് മറ്റ് സംസ്ഥാനങ്ങളിലെ സര്ക്കാരുകള് പിഎസ്സിയെ നോക്കുകുത്തിയാക്കിയതായി കണക്കുകള് പറയുന്നു. അരുണാചല് പ്രദേശ്, മണിപ്പുര്, മിസോറാം എന്നിവ ഒഴികെയുള്ള സംസ്ഥാനങ്ങളിലെ കണക്കുകളാണ് യുപിഎസ്സി പുറത്തുവിട്ടത്. കേരളം പിഎസ്സി വഴി പ്രതിവര്ഷം മുപ്പതിനായിരത്തിലേറെ നിയമനം നടത്തുമ്പോള് പല സംസ്ഥാനങ്ങളിലും ആയിരത്തില് താഴെയാണ് നിയമനം. സംവരണം അട്ടിമറിച്ചും രാഷ്ട്രീയ സ്വാധീനം ഉപയോഗിച്ചുമുള്ള താല്ക്കാലിക, കരാര് നിയമനങ്ങളാണ് മറ്റു സംസ്ഥാനങ്ങളില് ഏറെയും.
മൂന്നര കോടി ജനസംഖ്യയുള്ള കേരളം പ്രതിവര്ഷം മുപ്പതിനായിരത്തിലേറെ നിയമനം നടത്തി തൊഴില് രഹിതരായ യുവാക്കള്ക്ക് ആശ്വാസമേകുമ്പോള് 24 കോടി ജനസംഖ്യയുള്ള ഉത്തര്പ്രദേശില് പിഎസ്സി വഴി നിയമിച്ചത് 4120 പേരെമാത്രം. 2022-2023 ലെ പിഎസ്സി നിയമന ശുപാര്ശകളുടെ കണക്ക് യുപിഎസ്സിയാണ് പുറത്തുവിട്ടത്. കേരളം കഴിഞ്ഞാല് തമിഴ്നാടാണ് തൊട്ടുപിന്നില് 12645 നിയമനം. ഭൂരിപക്ഷം സംസ്ഥാനങ്ങളിലും ആയിരത്തില് താഴെയാണ് നിയമനം.