മാതൃഭാവമുള്ള കഥാപാത്രങ്ങളിലൂടെ മലയാളികളുടെ ഹൃദയത്തില് ഇടംനേടിയ വ്യക്തിയാണ് കവിയൂര് പൊന്നമ്മയെന്ന് മുഖ്യമന്ത്രി പിണറായി വിജയന്. ആ സുദീര്ഘമായ കലാജീവിതം സിനിമയില് മാത്രം ഒതുങ്ങിയിരുന്നില്ല. നാടകത്തിലും ടെലിവിഷനിലുമെല്ലാം ശ്രദ്ധേയമായ സംഭാവനകള് അവര് അര്പ്പിച്ചു.
കവിയൂര് പൊന്നമ്മയുടെ കലാജീവിതം തളിരിട്ടതും വളര്ന്നതും കേരളത്തിന്റെ പുരോഗമന സാംസ്കാരിക മുന്നേറ്റത്തില് നിര്ണ്ണായക പങ്കു വഹിച്ച കെപിഎസി-യിലാണ്. തുടര്ന്ന് മറ്റു പല പ്രധാന നാടകസമിതികളിലും പ്രവര്ത്തിച്ച അവര് മൂലധനം, പുതിയ ആകാശം പുതിയ ഭൂമി തുടങ്ങിയ അക്കാലത്തെ ജനപ്രിയ നാടകങ്ങളില് അവിസ്മരണീയമായ കഥാപാത്രങ്ങളെ അവതരിപ്പിച്ചു.
തുടര്ന്ന് അവര് വളരെ പെട്ടെന്നു തന്നെ മലയാള സിനിമയുടെ അവിഭാജ്യഘടകമായി. ഒരഗത്ഭരായ സംവിധായകരുടെ സിനിമകളില് വ്യത്യസ്തങ്ങളായ കഥാപാത്രങ്ങളിലൂടെ അവര് തിളങ്ങി. തന്മയത്വത്തോടെ അവതരിപ്പിച്ച അമ്മവേഷങ്ങള് മലയാളികളില് അവരോടുള്ള ആത്മബന്ധം സുദൃഢമാക്കി. നാലു തവണയാണ് മികച്ച സഹനടിക്കുള്ള സംസ്ഥാന ചലച്ചിത്ര പുരസ്കാരം കവിയൂര് പൊന്നമ്മയ്ക്ക് ലഭിച്ചത്. അവരുടെ അഭിനയ മികവിന് അടിവരയിടുന്ന നേട്ടമാണിത്.
മലയാള സിനിമയുടെയും നാടകലോകത്തിന്റേയും ചരിത്രത്തില് തന്റേതായ സ്ഥാനം ഉറപ്പിച്ച കവിയൂര് പൊന്നമ്മയുടെ നിര്യാണത്തോടെ തിളക്കമുള്ള ഒരു അദ്ധ്യായത്തിനാണ് തിരശ്ശീല വീണിരിക്കുന്നത്. തന്റെ കഥാപാത്രങ്ങളിലൂടെ അവര് മലയാളികളുടെ മനസ്സില് മായാതെ നില്ക്കും. കവിയൂര് പൊന്നമ്മയുടെ നിര്യാണത്തില് അനുശോചനം രേഖപ്പെടുത്തുന്നു. അവരുടെ കുടുംബാംഗങ്ങളുടേയും സുഹൃത്തുക്കളുടേയും ദു:ഖത്തില് പങ്കു ചേരുന്നുവെന്ന് മുഖ്യമന്ത്രി പറഞ്ഞു.