പുതുപ്പള്ളി ഉപതെരഞ്ഞെടുപ്പിലെ യുഡിഎഫ് വിജയത്തിനു പിറകെ പ്രതികരണവുമായി ബിജെപി അധ്യക്ഷൻ കെ സുരേന്ദ്രൻ. തെരഞ്ഞെടുപ്പ് ഫലം താത്കാലികം മാത്രമാണ്. അസാധാരണ വിധി എഴുത്തായി വിലയിരുത്തേണ്ടതില്ലെന്നും കെ സുരേന്ദ്രൻ പറഞ്ഞു.ചാണ്ടി ഉമ്മന് അഭിനന്ദനങ്ങൾ അറിയിക്കുകയും ചെയ്തു.
ഭരണവിരുദ്ധ വികാരവും, ഉമ്മൻചാണ്ടിയുടെ മരണം സൃഷ്ടിച്ച സഹതാപവുമാണ് പുതുപ്പള്ളിയിലെ തെരഞ്ഞെടുപ്പിൽ പ്രതികരിച്ചതെന്ന് കെ സുരേന്ദ്രൻ പറഞ്ഞു. സഹതാപ തരംഗമാണ് ചാണ്ടി ഉമ്മന്റെ വിജയത്തിന്റെ പ്രധാന ഘടകമെന്നായിരുന്നു പ്രതികരണം. തോൽവിയോട് പ്രതികരിച്ച എൽഡിഎഫ് നേതാക്കളേയും സുരേന്ദ്രൻ വിമർശിച്ചു.
വോട്ട് കുറഞ്ഞതിന് മറ്റുള്ളവരെ പഴിക്കുന്ന നിലപാടാണ് വാസവനും ഗോവിന്ദനും ഉള്ളത്. ബിജെപി വോട്ട് യുഡിഎഫിന് കിട്ടി എന്ന ആരോപണം സർക്കസിലെ കോമാളികൾ പോലും ഇത്തരം തമാശ പറയില്ലെന്ന് കെ സുരേന്ദ്രൻ വ്യക്തമാക്കി. വിഡ്ഢിത്തം ജനങ്ങൾക്ക് മനസ്സിലാകും. വോട്ട് കുറഞ്ഞിൽ സംഘടനാപരമായ വീഴ്ച എന്തെങ്കിലും ഉണ്ടോ എന്നത് അടക്കം പരിശോധിക്കുമെന്നും സുരേന്ദ്രൻ പറഞ്ഞു.
അതേസമയം പുതുപ്പള്ളിയിലെ തെരഞ്ഞെടുപ്പ് ഫലം ബിജെപിയെ നടുക്കിയിരിക്കുകയാണ്. 2016ല് ജോര്ജ് കുര്യൻ 15,993 വോട്ടുകള് നേടിയ മണ്ഡലത്തിലാണ് ഇപ്പോള് ഏഴായിരം വോട്ട് പോലും നേടാനാകാതെ ബിജെപി തകർന്ന് പോയത്. ജില്ലാ പ്രസിഡന്റിനെ തന്നെ കളത്തിലിറക്കിയിട്ടും വോട്ടു ചോര്ച്ചയുണ്ടായതിന്റെ ആഘാതത്തിൽ നിന്ന് കരകയറാൻ പാർട്ടി ഏറെ പരിശ്രമിക്കേണ്ടിവരുമെന്നാണ് വിലയിരുത്തൽ.