കെ സുധാകരൻ ഇനിയും കാത്തിരിക്കണം. കോണ്ഗ്രസിന്റെ രണ്ടാംഘട്ട സ്ഥാനാര്ത്ഥി പട്ടികയിലും കണ്ണൂര് ഉണ്ടായിരിക്കില്ല എന്നാണ് ഇപ്പോൾ ലഭിക്കുന്ന വിവരങ്ങൾ. ഇന്ദിരാ ഭവനില് ചേരുന്ന കോര് കമ്മിറ്റി യോഗത്തില് നേതാക്കള് ചര്ച്ചകള് നടത്തുകയാണ്. കേന്ദ്ര തെരഞ്ഞെടുപ്പ് സമിതിയും വിഷയം പരിശോധിക്കും. കെ സുധാകരനോട് കാത്തിരിക്കാന് കോണ്ഗ്രസ് നേതൃത്വം നിര്ദേശം നല്കി.
തെരഞ്ഞെടുപ്പില് കണ്ണൂരിൽ നിന്ന് മത്സരിക്കുമെന്ന ഉറച്ച നിലപാടിലാണ് കെ സുധാകരന്. നാമനിര്ദേശ പത്രിക സമര്പ്പിക്കാനുള്ള നീക്കങ്ങളും സുധാകരന് തുടങ്ങിയിട്ടുണ്ട്. കണ്ണൂർ സീറ്റ് നൽകിയില്ലെങ്കിൽ സുധാകരൻ കടുത്ത നിലപാടിലേക്ക് പോകുമെന്ന് കോൺഗ്രസിന് അറിയാം. അതുകൊണ്ടുതന്നെ സുധാകരനെ അനുനയിപ്പിച്ച് ഒപ്പം നിർത്താനാണ് കോൺഗ്രസ് തീരുമാനം.
കോണ്ഗ്രസിന്റെ ആദ്യഘട്ട സ്ഥാനാര്ത്ഥി പട്ടിക പുറത്തുവന്നതിന് പിന്നാലെ കെ സുധാകരനെ സ്ഥാനാര്ത്ഥി പട്ടികയില് ഉള്പ്പെടുത്താത്തതിനെതിരെ സുധാകരന് അനുയായികളുടെ വ്യാപക പ്രതിഷേധമുയര്ന്നിരുന്നു. കെപിസിസി അധ്യക്ഷന് സണ്ണി ജോസഫിനെതിരെ പേരാവൂരില് പോസ്റ്ററുകളും പ്രത്യക്ഷപ്പെട്ടിരുന്നു. കെ എസ് ബ്രിഗേഡിന്റെ പേരിലായിരുന്നു താക്കീത്. ‘നന്ദി ഇല്ലെങ്കിലും നന്ദികേട് ആവരുത് സണ്ണീ… തിരിച്ചടി നേരിടേണ്ടിവരും… ശ്രീ കെ സുധാകരന് അഭിവാദ്യങ്ങള്’ എന്നാണ് പോസ്റ്ററില് പറയുന്നത്.