തിരുവനന്തപുരം മെഡിക്കല് കോളജില് അവയവമാറ്റ ശസ്ത്രക്രിയ വൈകിയതിനെ തുടര്ന്ന് രോഗി മരിച്ച സംഭവത്തില് പഴുതടച്ച അന്വേഷണം വേണമെന്ന് കെപിസിസി അധ്യക്ഷന് കെ സുധാകരന്. ഒരു മനുഷ്യ ജീവന് രക്ഷിക്കുന്നതില് കാണിച്ച അലംഭാവം പൊറുക്കാന് കഴിയില്ലെന്നും കുറ്റക്കാര്ക്കെതിരെ കര്ശന നടപടിയെടുക്കണമെന്നും അദ്ദേഹം ആവശ്യപ്പെട്ടു.
എറണാകുളം രാജഗിരി ആശുപത്രിയില് നിന്ന് മെഡിക്കല് കോളജ് സൂപ്പര് സ്പെഷ്യാലിറ്റി ബ്ലോക്കിന്റെ കവാടത്തിലെത്തിച്ച വൃക്ക ഏറ്റുവാങ്ങാന് വൈകിയെന്നത് ഗുരുതര ആരോപണമാണ്. കുറ്റം ആരുടെ ഭാഗത്തായാലും മാതൃകാപരമായ ശിക്ഷ അനിവാര്യമാണ്. ഏകോപനത്തിലെ പിഴവാണ് ഒരുജീവന് നഷ്ടപ്പെടാന് കാരണം. സംഭവത്തിന്റെ ഉത്തരവാദിത്വത്തില് നിന്നും സര്ക്കാരിന് മാറിനില്ക്കാനാകില്ല. ആരോഗ്യവകുപ്പും ഈ സംഭവത്തില് പ്രതിസ്ഥാനത്താണെന്നും സുധാകരന് വ്യക്തമാക്കി.
കൃത്യമായ അന്വേഷണം നടത്തണം. സാങ്കേതികത്വം ചൂണ്ടിക്കാട്ടി കുറ്റക്കാരെ സംരക്ഷിക്കാന് ശ്രമിച്ചാല് ഇത്തരം സംഭവങ്ങള് തുടര്ക്കഥയാകും. ആരോഗ്യ രംഗത്ത് ദേശീയപ്രശംസ നേടിയിട്ടുള്ള കേരളത്തെ നാണം കെടുത്തുന്ന ഇത്തരം സംഭവങ്ങള് ആവര്ത്തിക്കാതിരിക്കാന് സര്ക്കാര് പ്രത്യേകം ശ്രദ്ധിക്കണമെന്നും അകാലത്തില് ജീവന് നഷ്ടമായ സുരേഷ് കുമാറിന്റെ കുടുംബത്തെ സംരക്ഷിക്കാനുള്ള ഉത്തരവാദിത്തം സര്ക്കാര് ഏറ്റെടുക്കണമെന്നും സുധാകരന് കൂട്ടിച്ചേര്ത്തു.
കാരക്കോണ സ്വദേശി സുരേഷ് കുമാറാണ് ഇന്നലെ മരിച്ചത്. ഇയാളുടെ മൃതദേഹം ഇന്ന് പോസ്റ്റുമോര്ട്ടം ചെയ്യും. സംഭവത്തില് പൊലീസ് അസ്വാഭാവിക മരണത്തിന് കേസെടുത്തിട്ടുണ്ട്. സുരേഷിന്റെ സഹോദരന് നല്കിയ പരാതിയെ തുടര്ന്നാണ് കേസെടുത്തത്.