പത്തനംതിട്ട കോന്നിയില് ഷോക്കേറ്റ് കാട്ടാന ചരിഞ്ഞ സംഭവത്തില് വനം വകുപ്പ് കസ്റ്റഡിയിലെടുത്തയാളെ ബലംപ്രയോഗിച്ച് മോചിപ്പിച്ചെന്ന ആരോപണത്തില് പ്രതികരണവുമായി കെയു ജനീഷ് കുമാര് എംഎല്എ. വനം വകുപ്പ് ആന ചരിഞ്ഞതുമായി ബന്ധപ്പെട്ട് ഗുണ്ടാ രീതിയിലുള്ള അന്തരീക്ഷം സൃഷ്ടിച്ചത് കൊണ്ടാണ് താന് ഈ കേസില് ഇടപെട്ടതെന്ന് എംഎല്എ പറഞ്ഞു.
ജനങ്ങള് കാട്ടാന ശല്യം കൊണ്ട് ജനം പൊറുതി മുട്ടുന്നു. എന്നാല് വനംവകുപ്പ് പ്രദേശത്തെ ജനങ്ങളെ അനധികൃതമായി കസ്റ്റഡിയിലെടുക്കുകയാണ് ചെയ്യുന്നത്. താന് അവിടെ എത്തിയത് നാട്ടുകാരുടെ പ്രതിഷേധത്തില് പങ്കെടുക്കാനാണ്. നാട്ടുകാരെ അനധികൃതമായി കസ്റ്റഡിയിലെടുക്കുകയും പിന്നീട് വിട്ടയക്കുകയും ചെയ്യുകയാണ് വനംവകുപ്പ് ചെയ്തതെന്നും എംഎല്എ കൂട്ടിച്ചേര്ത്തു.
നിരപരാധികളായ അവരെ എങ്ങനെയെങ്കിലും പ്രതികളാക്കി കുറ്റം അടിച്ചേല്പ്പിക്കാനുള്ള ശ്രമമാണ് നടക്കുന്നത്. നക്സലുകള് വീണ്ടും വരുമെന്നും ഫോറസ്റ്റ് ഓഫീസ് കത്തിക്കുമെന്നും പറഞ്ഞത് അപ്പോഴത്തെ രോഷത്തില് സംഭവിച്ചതാണ്. താന് ഈ കേസില് നിയമ വിരുദ്ധമായി ഒന്നും ചെയ്തിട്ടില്ലെന്നും എംഎല്എ വ്യക്തമാക്കി.
കോന്നി കുളത്തു മണ്ണില് പൈനാപ്പിള് കൃഷിയ്ക്കായി പാട്ടത്തിനെടുത്ത ഭൂമിയില് ഉയര്ന്ന അളവില് വേലിയില് വൈദ്യുതി കടത്തിവിട്ടിരുന്നതാണ് വനം വകുപ്പിന്റെ ആരോപണം. ഇതില് നിന്ന് ഷോക്കേറ്റാണ് കാട്ടാന ചരിഞ്ഞതെന്ന് ആരോപിച്ച് ഭൂമി പാട്ടത്തിനെടുത്തയാളുടെ സഹായിയെയാണ് സംഭവത്തെ തുടര്ന്ന് വനം വകുപ്പ് കസ്റ്റഡിയിലെടുത്തത്.
പത്തനംതിട്ട പാടം ഫോറസ്റ്റ് സ്റ്റേഷനിലെ വനംവകുപ്പ് ഉദ്യോഗസ്ഥരാണ് ഇയാളെ കസ്റ്റഡിയിലെടുത്തത്. ഇയാളെയാണ് എംഎല്എ വനം വകുപ്പ് ഓഫീസിലെത്തി മോചിപ്പിച്ചത്.