വിവാദ പരാമര്‍ശങ്ങളില്‍ കെ.എം ഷാജിയുടെ വിശദീകരണം തൃപ്തികരമെന്ന് സാദിഖലി തങ്ങള്‍ പറഞ്ഞതിനോട് പ്രതികരണവുമായി പികെ കുഞ്ഞാലിക്കുട്ടി. ഏത് വിഷയത്തിലും പാണക്കാട് തങ്ങള്‍ അഭിപ്രായം പറഞ്ഞാല്‍ മറിച്ചൊരു അഭിപ്രായം ലീഗില്‍ ഇല്ലെന്ന് കുഞ്ഞാലിക്കുട്ടി പറഞ്ഞു.
നേതാക്കള്‍ക്ക് എപ്പോള്‍ വേണമെങ്കിലും പാണക്കാട് തങ്ങളെ കാണാം. മുനീറും ഇ.ടിയും തങ്ങളെ സന്ദര്‍ശിച്ചത് അങ്ങനെ കണ്ടാല്‍ മതി. ലീഗില്‍ രണ്ടു ചേരി ഇല്ലെന്നും അച്ചടക്ക സമിതി തീരുമാനം നേരത്തെ എടുത്തതാണെന്നും അദ്ദേഹം പറഞ്ഞു.
പാര്‍ട്ടിയുടെ കെട്ടുറപ്പിനെ ബാധിക്കുന്ന വിധത്തില്‍ മുന്നോട്ടു പോകരുതെന്ന് കെ എം ഷാജിക്ക് നിര്‍ദേശം നല്‍കിയതായി പാണക്കാട് സാദിഖലി ശിഹാബ് തങ്ങള്‍ അറിയിച്ചിരുന്നു. മേലില്‍ പാര്‍ട്ടിയെ പ്രതിസന്ധിയിലാക്കില്ലെന്ന് കെഎം ഷാജി നേതൃത്വത്തിന് ഉറപ്പ് നല്‍കിയിട്ടുണ്ട്.
പാര്‍ട്ടി വേദികളില്‍ പറയുന്നത് പൊതുവേദികളില്‍ പറയാന്‍ പാടില്ലെന്ന കര്‍ശന നിര്‍ദേശമാണ് പാണക്കാട് സാദിഖലി ശിഹാബ് തങ്ങള്‍ ഷാജിക്ക് നല്‍കിയത്. പ്രവര്‍ത്തികര്‍ക്കിടയില്‍ സ്വീകാര്യതയുള്ള നേതാവ് എന്ന നിലയില്‍ പ്രവര്‍ത്തനങ്ങളിലും പ്രസംഗങ്ങളിലും സൂക്ഷ്മത പാലിക്കണം. ഇനി മുതല്‍ വീഴ്ചകളുണ്ടാവാതെ ശ്രദ്ധിക്കാമെന്ന് കെഎം ഷാജി ഉറപ്പുനല്‍കി.