ക്രിസ്തുവിന്റെ അനുയായികൾ എൻഡിഎയ്ക്ക് വോട്ട് ചെയ്യണമെന്ന് കേന്ദ്ര ആഭ്യന്തര മന്ത്രി അമിത് ഷാ. എൻഡിഎ കേരളത്തിൽ ഭരണത്തിലെത്തിയാൽ രണ്ട് വർഷത്തിനുള്ളിൽ എയിംസിൻറെ പണി തുടങ്ങുമെന്നും അദ്ദേഹം പറഞ്ഞു. കുന്നത്തുനാടിൽ ട്വൻറി20 സ്ഥാനാർത്ഥികളുടെ തെരഞ്ഞെടുപ്പ് പ്രചാരണ കൺവെൻഷനിൽ സംസാരിക്കുകയായിരുന്നു അമിത് ഷാ.
എറണാകുളം ജില്ലയിലെ ട്വൻറി20 സ്ഥാനാർഥികൾ എല്ലാവരും പരിപാടിയിൽ പങ്കെടുത്തു. കേരളത്തിൻറെ ചരിത്രം മാറ്റി എഴുതുന്ന തെരഞ്ഞെടുപ്പ് ആണ് നടക്കുന്നതെന്നും എൽഡിഎഫും യുഡിഎഫും മാറി മാറി ഭരിച്ച കേരളത്തിൽ അഴിമതി മാത്രമാണ് കൂടി വരുന്നതെന്ന് അമിത് ഷാ പറഞ്ഞു. കേരളം ശരിയായ ദിശയിലേക്ക് വരണമെങ്കിൽ മോദി നേതൃത്വം നൽകുന്ന ബിജെപി ഭരണത്തിൽ വരണം.
കേരളത്തിൽ സാക്ഷരത കൂടുതലാണ്. എന്നാൽ, ജോലി വേണമെങ്കിൽ ഗൾഫിലേക്ക് അടക്കം പോകണം. ലോക്സഭ തെരഞ്ഞെടുപ്പിൽ 2014ൽ എൻഡിഎയുടെ വോട്ട് ശതമാനം 14 ആയിരുന്നു 2019ൽ 16 ആയും 2024ൽ 20 ശതമാനവുമായി ഉയർന്നു. ഭാവിയിൽ കേരളം ബിജെപി ഭരിക്കുമെന്നതിൻറെ സൂചനയാണിത്. സ്മാർട്ട് സിറ്റി പദ്ധതി , കൊച്ചി മെട്രോ രണ്ടാം ഘട്ടം എന്നിവയടക്കം കൊച്ചിക്ക് വേണ്ടി നിരവധി വികസന പദ്ധതികൾക്ക് സാമ്പത്തിക സഹായങ്ങൾ കേന്ദ്രം നൽകുന്നുണ്ട്. ബിജെപിക്ക് മുന്നിൽ എല്ലാവരും തുല്യരാണ്. പ്രീണന രാഷ്ട്രീയമില്ല എന്നും അമിത് ഷാ പറഞ്ഞു.