യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിൽ എംഎൽഎ അർധരാത്രിയിൽ പിവി അൻവറിനെ വീട്ടിലെത്തി കണ്ടതിൽ പ്രതികരിച്ച് സിപിഐഎം കേന്ദ്ര കമ്മിറ്റി അംഗം എളമരം കരീം. രാഹുൽ മാങ്കൂട്ടത്തിൽ ഒറ്റയ്ക്ക് പോയി അങ്ങനെ സംസാരിക്കുമെന്ന് കരുതുന്നില്ല. പിടിക്കപ്പെട്ടപ്പോൾ നേതൃത്വം തള്ളി പറയുന്നതാണെന്നും എളമരം കരീം അഭിപ്രായപ്പെട്ടു.
നിലമ്പൂർ ഉപതിരഞ്ഞെടുപ്പിൽ മത്സരം എൽഡിഎഫും യുഡിഎഫും തമ്മിലാണെന്നും എളമരം കരീം പറഞ്ഞു. പിവി അൻവർ മത്സരിക്കുന്നത് എൽഡിഎഫിനെ ബാധിക്കില്ല. അൻവർ മത്സരിക്കുന്നതുകൊണ്ട് എൽഡിഎഫിന് കൂടുതൽ അനുകൂല സാഹചര്യമാണ് ഉണ്ടാവുക. ഇക്കാരണത്താൽ ഒറ്റവോട്ട് പോലും എൽഡിഎഫിന് നഷ്ടപ്പെടില്ലെന്നും എളമരം കരീം പറഞ്ഞു.
‘എം സ്വരാജ് പ്രകൃതി ദുരന്തസമയത്ത് ഇടപെട്ടില്ലായെന്നത് പച്ചക്കള്ളമാണ്. മറ്റൊരു മണ്ഡലത്തിലെ എംഎൽഎ ആയിട്ട് പോലും സ്വരാജ് വന്നുവെന്ന് അൻവറിന്റെ തന്നെ ഫേസ്ബുക്ക് കുറിപ്പിൽ പറഞ്ഞിട്ടുണ്ട്’, എന്നും എളമരം കരീം പറഞ്ഞു. പ്രതിപക്ഷ നേതാവ് വിഡി സതീശനും മുഖ്യമന്ത്രി പിണറായി വിജയനും തമ്മിൽ അന്തർധാരയുണ്ടെന്ന് പറഞ്ഞാൽ ലോകത്തിലെ ആരും വിശ്വസിക്കില്ലെന്നും എളമരം കരീം ചൂണ്ടിക്കാണിച്ചു.
