സംസ്ഥാനത്ത് അടുത്ത അഞ്ച് ദിവസങ്ങളില് ശക്തമായ മഴയ്ക്ക് സാധ്യതയുള്ളതായി കേന്ദ്ര കാലാവസ്ഥാവകുപ്പ്. ഇന്ന് ജൂണ് 10 മുതല്-14 വരെ ഇതിന്റെ ഭാഗമായി വിവിധ ജില്ലകളില് ഓറഞ്ച്, മഞ്ഞ അലര്ട്ടുകള് പ്രഖ്യാപിച്ചിട്ടുണ്ട്. ജൂണ് 11-ന് ഇടുക്കി, എറണാകുളം, തൃശൂര് ജില്ലകളിലും ജൂണ് 12-ന് കോട്ടയം, ഇടുക്കി, എറണാകുളം ജില്ലകളിലുമാണ് ഓറഞ്ച് അലര്ട്ട് പ്രഖ്യാപിച്ചിരിക്കുന്നത്.
ജൂണ് പത്തിന് തിരുവനന്തപുരം, കൊല്ലം, പത്തനംതിട്ട, ഇടുക്കി, കോഴിക്കോട്, കണ്ണൂര്, കാസര്ഗോഡ് ജില്ലകളിലും ജൂണ് 11-ന് പത്തനംതിട്ട, ആലപ്പുഴ, കോട്ടയം, പാലക്കാട്, മലപ്പുറം ജില്ലകളിലും മഞ്ഞ ജാഗ്രതാ നിര്ദേശമുണ്ട്. ജൂണ് 12-ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, തൃശൂര് ജില്ലകളിലും 13-ന് കോഴിക്കോട്, കണ്ണൂര്, കാസര്ഗോഡ് ജില്ലകളിലും 14-ന് എറണാകുളം, തൃശൂര്, പാലക്കാട്, മലപ്പുറം ജില്ലകളിലുമാണ് മഞ്ഞ അലര്ട്ട് പ്രഖ്യാപിച്ചിരിക്കുന്നത്.
മഴ ശക്തമാകുന്ന സാഹചര്യത്തില് ഉരുള്പൊട്ടല്, മണ്ണിടിച്ചില്, മലവെള്ളപ്പാച്ചില് സാധ്യതയുള്ള പ്രദേശങ്ങളിലും നദിക്കരകളിലും താമസിക്കുന്നവര് അധികൃതരുടെ നിര്ദേശാനുസരണം സുരക്ഷിത സ്ഥാനങ്ങളിലേക്ക് മാറി താമസിക്കണമെന്ന് ദുരന്ത നിവാരണ അതോറിറ്റി നിര്ദേശിച്ചു. ദുരന്തസാധ്യത മേഖലകളിലുള്ളവര് തങ്ങളുടെ പ്രദേശത്തെ ക്യാമ്പുകള് തുറന്നിട്ടുണ്ടെന്ന് ഉറപ്പാക്കുകയും പകല് സമയത്ത് തന്നെ അങ്ങോട്ട് മാറി താമസിക്കുകയും വേണം. ഇതിനായി തദ്ദേശ സ്ഥാപനങ്ങളുമായോ റവന്യൂ അധികാരികളുമായോ ബന്ധപ്പെടാവുന്നതാണ്.
അടച്ചുറപ്പില്ലാത്ത വീടുകളിലും മേല്ക്കൂര ശക്തമല്ലാത്ത വീടുകളിലും താമസിക്കുന്നവര് പ്രത്യേക ജാഗ്രത പാലിക്കണമെന്നും അപകടാവസ്ഥയുണ്ടെങ്കില് സുരക്ഷിത സ്ഥാനങ്ങളിലേക്ക് മാറണമെന്നും അറിയിപ്പുണ്ട്. ശക്തമായ മഴയുള്ളപ്പോള് ഒരു കാരണവശാലും നദികള് മുറിച്ചു കടക്കാനോ, ജലാശയങ്ങളില് കുളിക്കാനോ മീന്പിടിക്കാനോ ഇറങ്ങാന് പാടുള്ളതല്ല. ജലാശയങ്ങള്ക്ക് മുകളിലെ മേല്പ്പാലങ്ങളില് കയറി കാഴ്ച കാണുകയോ സെല്ഫി എടുക്കുകയോ ചെയ്യുന്നത് ഒഴിവാക്കണം.
അത്യാവശ്യമല്ലാത്ത യാത്രകള് ഒഴിവാക്കണമെന്നും വെള്ളച്ചാട്ടങ്ങള്, ജലാശയങ്ങള്, മലയോര മേഖലകള് എന്നിവിടങ്ങളിലേക്കുള്ള വിനോദയാത്രകള് മഴ മുന്നറിയിപ്പ് മാറുന്നത് വരെ മാറ്റിവയ്ക്കണമെന്നും നിര്ദേശമുണ്ട്. റോഡപകടങ്ങള് വര്ധിക്കാന് സാധ്യതയുള്ളതിനാല് ജലാശയങ്ങള് കരകവിഞ്ഞ് ഒഴുകുന്നയിടങ്ങളില് വാഹനം ഓടിക്കാന് ശ്രമിക്കരുത്.
ദുരന്ത സാധ്യത മേഖലയിലുള്ളവര് അടിയന്തരമായി എമര്ജന്സി കിറ്റ് തയ്യാറാക്കി വയ്ക്കേണ്ടതാണ്. എല്ലാ ജില്ലകളിലും 24 മണിക്കൂറും പ്രവര്ത്തിക്കുന്ന കണ്ട്രോള് റൂമുകള് സജ്ജമാണ്. സഹായങ്ങള്ക്കായി 1077, 1070 എന്നീ ടോള് ഫ്രീ നമ്പറുകളില് ബന്ധപ്പെടാവുന്നതാണ്. മുന്നൊരുക്കങ്ങളെ സംബന്ധിച്ച കൂടുതല് വിവരങ്ങള് സംസ്ഥാന ദുരന്ത നിവാരണ അതോറിറ്റിയുടെ ‘ഓറഞ്ച് പുസ്തകം 2025’-ല് ലഭ്യമാണ്. കാലാവസ്ഥാ മുന്നറിയിപ്പുകളിലെ മാറ്റങ്ങള്ക്കനുസരിച്ച് അലര്ട്ടുകളില് മാറ്റം വരാമെന്നും ദുരന്ത നിവാരണ അതോറിറ്റിയുടെ ഔദ്യോഗിക പേജുകള് ശ്രദ്ധിക്കണമെന്നും അറിയിപ്പില് പറയുന്നു.