സംസ്ഥാനത്ത് അടുത്ത 5 ദിവസം ശക്തമായ മഴയ്ക്കുള്ള സാധ്യത പ്രഖ്യാപിച്ച് കേന്ദ്ര കാലാവസ്ഥ വകുപ്പ്. ഇന്ന് ഓഗസ്റ്റ് 16 മുതല് 19 വരെ ഒറ്റപ്പെട്ട അതിശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ഓഗസ്റ്റ് 16 മുതല് 20 വരെ ഒറ്റപ്പെട്ട ശക്തമായ മഴയ്ക്കും സാധ്യതയുണ്ടെന്നും കാലാവസ്ഥ വകുപ്പിന്റെ ജാഗ്രത നിര്ദേശം.
19 വരെ 40 മുതല് 50 കിലോമീറ്റര്വരെ വേഗത്തില് ശക്തമായ കാറ്റിനു സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു. ഇടുക്കി, എറണാകുളം, തൃശൂര്, കണ്ണൂര്, കാസര്കോട് ജില്ലകളില് ഇന്ന് ഓറഞ്ച് അലര്ട്ടായിരുന്നു. നാളെ കണ്ണൂര്, കാസര്കോട് ജില്ലകളില് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, പാലക്കാട്, മലപ്പുറം, കോഴിക്കോട്, വയനാട് ജില്ലകളില് ഇന്ന് യെലോ അലര്ട്ടും ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് നാളെ യെലോ അലര്ട്ടുമാണ്.
മൂന്നാര് ഗ്യാപ് റോഡില് ഇന്നും നാളെയും രാത്രിയാത്ര നിരോധനം ഏര്പ്പെടുത്തിയിട്ടുണ്ട്. പത്തനംതിട്ട കക്കി ഡാമിന്റെ 2 ഷട്ടറുകള് തുറന്നു. പമ്പ തീരത്തുള്ളവര് ജാഗ്രത പാലിക്കണം.നാളെ പീച്ചി, ബാണാസുര സാഗര്, ഭൂതത്താന് കെട്ട് ഡാമുകളുടെ ഷട്ടറുകള് ഉയര്ത്തും.
തെക്കന് ഛത്തീസ്ഗഡിന് മുകളിലായി ന്യൂനമര്ദം സ്ഥിതിചെയ്യുന്നു. പടിഞ്ഞാറ് വടക്കു പടിഞ്ഞാറ് ദിശയില് സഞ്ചരിച്ചു ശക്തി കുറഞ്ഞു ചക്രവാതച്ചുഴിയായി ഓഗസ്റ്റ് 18ഓടെ ഗുജറാത്തിന് മുകളില് എത്തിച്ചേരാന് സാധ്യതയുണ്ട്. വടക്കു പടിഞ്ഞാറന്- മധ്യ പടിഞ്ഞാറന് ബംഗാള് ഉള്ക്കടലിനു മുകളില് ഓഗസ്റ്റ് 18 ഓടെ പുതിയ ന്യൂനമര്ദം രൂപപ്പെടാന് സാധ്യതയുണ്ട്.