തിരുവനന്തപുരം തൊളിക്കോട് ഗ്രാമപഞ്ചായത്തില്‍ യോഗത്തിന് ഇടയില്‍ കൈയാങ്കളി. പ്രതിപക്ഷ അംഗമായ അന്‍സര്‍ തോട്ടുമുക്ക് ദേഹത്ത് പെട്രോള്‍ ഒഴിച്ച് ആത്മഹത്യാഭീഷണി മുഴക്കി. പഞ്ചായത്ത് യോഗത്തില്‍ എടുക്കുന്ന തീരുമാനങ്ങളല്ല നടപ്പിലാക്കുന്നത് എന്ന് ആരോപിച്ചായിരുന്നു പ്രതിഷേധം. രാവിലെ പത്തരയ്ക്കായിരുന്ന്ു സംഭവം.
എല്‍ഡിഎഫ് ഭരിക്കുന്ന പഞ്ചായത്തിലെ കോണ്‍ഗ്രസ് അംഗങ്ങളാണ് പ്രതിഷേധിച്ചത്. ജനാധിപത്യ മര്യാദകള്‍ ലംഘിച്ച് പഞ്ചായത്ത് പ്രസിഡന്റും ഭരണസമിതി അംഗങ്ങളും ഏകപക്ഷീയമായി ഫണ്ട് അനുവദിക്കുന്നു എന്ന് അന്‍സര്‍ ആരോപിച്ചു. വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാനാണ് അന്‍സര്‍ തോട്ടുമുക്ക്.
യോഗങ്ങളിലെടുക്കുന്ന എല്‍ഡിഎഫിന്റെ നേതൃത്വത്തിലുള്ള ഭരണ സമിതി മിനിട്സില്‍ രേഖപ്പെടുത്താതെ ആണ് നടപ്പിലാക്കുന്നത് എന്നും യുഡിഎഫ് അംഗങ്ങളുടെ വാര്‍ഡുകളെ അവഗണിക്കുകയാണ്, ഭരണപക്ഷത്തിന്റെ വാര്‍ഡുകളില്‍ മാത്രമേ വികസനപ്രവര്‍ത്തനങ്ങള്‍ നടക്കുന്നുള്ളൂ എന്നുമുള്ള ആരോപണങ്ങള്‍ നേരത്തെ ഉയര്‍ന്നിരുന്നു.